Nukissiorfiit pisortaat, Kaspar Mondrup. Assi: Malik Brøns / KNR

Nukissiorfiit: Erngup nukinganik nukissiorfik aaqqeqqippoq – juullimut qulliit ikissinnaavasi

Ajornartoornermiikkunnaarpugut, sarfamillu sipaartariaarulluta. Aaqqiissutaagallartormi ullumi naammassineqarpoq, Nukissiorfiit oqarput.

- Innuttaasut pisoq pillugu toqqissiallassinnaapput, neriuppungalu kikkut tamarmik juullimut ullorissatit ikeqqissagaat.

Nukissiorfiit pisortaat, Kaspar Mondrup KNR-imut oqarpoq.

Upalungaarsimasut Nukissiorfiillu sapaatip akunnerata naanerani sarfamik sipaartoqaannarnissaa tallimanngornermi ualikkut nalunaarutigigaluarpaat. Nalunaarulli taanna alaannarneqarsinnaalerpoq.

AAMMA ATUARUK Upalungaarsimasut: Anorersuaq ajornartoornermi nukissiuummut sunniuteqarnavianngilaq

Nuummi ataasinngormalli qamittooqattaarneranut pissutaasoq ullumi aaqqinneqarpoq.

Nukissiorfiit tjekker kablerne. Foto: Nukissiorfiit. 

Tassa imaappoq erngup nukinganik nukissiorfimmit innaallagiaqaleqqippugut, sarfamillu atuerusunnitsitut atuisinnaaleqqilluta.

- Nuannaarutigalugu nalunaarutigisinnaavara tamakkiisumik sarfalersuileqqikkatta. Utoqqarmiut Kangerluarsunnguani erngup nukinganit nukissiorfimmit pilersuileqqippugut. Illoqarfimmi ajornartoornermi nukissiuutit generatorit maanna qamiterpagut, Kaspar Mondrup oqarpoq.

Upalungaarsimasut arfininngornermi anorersuarnissaa tallimanngornermi aarlerisaarutigaat. Nukissiorfiilli anorersuup Nuummut innaallagiamik pilersuineq sunnernavianngikkaa oqaatigaa.

Nukissiorfiit oqarnerat naapertorlugu kabelit ”utaqqiisaarutaasumik” aaqqinneqarallarput.

Kabilit kittorarnikut peerlugit atassutileqqinneqarput. Tamanna iluamik aaqqissuussinissap tungaanut atorsinnaalluarpoq, Nukissiorfiit pisortaat oqarpoq:

- Aasaru nukissiuutinik atuivallaarunnaarutta piffissami sivikinnerusumi ajornartoornermi nukissiuutit atulerseqqillugit sivisuumik atuuttussamik iluarsartuussisinnaavugut.

Ajornartorsiutaasup aaqqinnissaa ullunik sapaatillu akunnerinik sivisussuseqassasoq

Qamittoornermut pissutaasoq nassaarneqartoq Nukissiorfiit pisortaata, Kaspar Mondrupip sisamanngornermi ualikkut tusagassiortunik katersortitsinermi nassuiaatigaa.

Ajoqutaasoq erngup nukinganik nukissiorfiup eqqaani kordelip kittorarneraa. Kabelit ataatsimoortuupput, tassanili kittorartoqarsimavoq, taamaalilluni immunnut attuunnerat pissutigalugu Nuummi qamittoortitsilluni.

Nukissiorfiup pisortaata ajoqutaasoq ullualuit iluanni iluarsaanneqarsinnaasoq imaluunniit sapaatini akunnerni arlalinni iluarsaanneqarsinnaasoq nalileraluarpaa.

Aaqqiissuteqarniarnerli ullumik ataasiinnarmik sivisussuseqarpoq. Nukissiorfiit Air Greenlandip qulimiguulianut ilaallutik kabelinik tallimanngornermi iluarsaassiartorput.

- Aaqqissornera naatsorsuutigisamit sukkanerujussuuvoq, Kaspar Mondrup oqarpoq.

- Ullormi ataasiinnaq suliarineqarpoq. Tamanna Air Greenlandip sulisutsinnik qanimut inissiilluartup suleqatigilluarneranik pissuteqarpoq.

Kabelit ajoqusernerat ima isikkoqaraluarpoq:

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl