Nukissiorfiit amigartooruteqaqqittut

Nukissiorfiit ukiumoortumik nalunaarusiaata 2014-imoortup takutippaa suliffeqarfik amigartooruteqartoq. Taamaattorli 2014-imi naatsorsuutitigut angusat 2013-imut naleqqiullugit 11 millionit koruuninik pitsanngoriaateqarput. Tassami Nukissiorfiit 2013-imi 44 millionit koruuninik amigartooruteqarput, siornalu 2014-imi 33 millionit koruuninik amigartooruteqarlutik.
Allattoq Hagen Højer Christensen
maajip 13-at 2015 06:10
Nutserisoq Mads Lynge

Ilanngaatissat ilanngaatigereerlugit kaaviiaartitat procentimik ataatsimik minnerusumik ikileriarput, 826 millionit koruuninut ikileriaramik.

Nukissiorfiit ukiumoortumik nalunaarusiaannut atatillugu ilanngullugu oqaatigineqarpoq nammineersinnaalerluni, sullittakkanullu samminerulerniarluni, pisortaniillu tapiissutitaqanngitsumik ingerlatsisinnaalerniarluni Nukissiorfiit iliuusissanik sisamanik suliaqarlutik aallartipput. Tassaasunik sullitat nuannaartut, aningaasaqarneq pitsaasoq, erseqqissumik aqutsineq aamma imeq minguitsoq.

Sullitat nuannaartut kinguneraat ataatsimoortitsineq, sullittakkanillu sullissinerup assigiiaarnera, taamaaliornikkut nuna tamakkerlugu sullittakkat assigiimmik pitsaasumik misigisaqassammata, Nukissiorfiit ukiumoortumik nalunaarusiaminni ilaatigut taama allaaserisaqarput.

AAMMA ATUARUK Nukissiorfiit innaallagissamut, imermut kiassarnermullu akigititaat allanngortut

 

Imermik pilersuineq pitsaanerulersinniarneqartoq

Nukissiorfiit sullittagaat tamarmik imermik minguitsumik pisinnaanissaminnut piumasaqarsinnaasut allaaserineqarpoq, tassungalu atatillugu assersuutigalugu nunaqarfinni imeqarfiit pitsaanerusut imerlu naqitsinikkut ingerlatinneqartoq oqaluuserineqarput:

- 2014-imi naatsorsuutitigut angusani pingaarnerni ineriartorneq naammaginartuusoq takuneqarsinnaavoq tamannalu sulissutigiuassavarput, Nukissiorfiit ilaatigut taama allapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq