Nukissiorfiit innaallagissamut, imermut kiassarnermullu akigititaat allanngortut
Februaarip aallaqqaataanit atuutilersumik innaallagissamut imermullu akit annikitsumik akikillipput, ungasianit kiassarnermut aamma kiassanermut qaminneqarsinnaasunut akit annikitsumik qaffallutik.
Allattoq Jaaku Lyberth
februaarip 05-at 2015 05:25
- Kiassaanermut akigitinneqartut qaffannerannut pissutaavoq ikummatissanut aningaasartuutivut ukiup ataatsip matuma siornanit annertunerunerat, aamma 1. oktobarimi kiassaanermut akigitinneqartunik qaffaasimannginnerput, taamanikkut akit kingullermik iluarsiiffigaavut, Nukissiorfinni pisortaanerugallartoq Michael Pedersen tusagassiorfinnut nalunaaruteqarluni taama oqarpoq.
Akigitinneqartunut allannguutit Naalakkersuisunit akuersissutigineqarsimasut, Nukissiorfiit aamma ilisimatitsissutigaat.
Paasissutissat: Akit nutaat
Innaallagissamut akigitinneqartut qaffasinnerpaaffiat 8,6 procentinik apparpoq kWh-mut 3,47 koruuninit 3,17 koruuninut. Akigitinneqartut appasinnerpaaffiat 8,8 procentinik apparpoq kWh-mut 1,71 koruuninit 1,56 koruuninut.
Imermut akigitinneqartut qaffasinnerpaaffiat 6,9 procentinik apparpoq kubikmeterimut 35,49 koruuninit 33,03 koruuninut. Akigitinneqartut appasinnerpaaffiat 8 procentinik apparpoq kubikmeterimut 15,46 koruuninit 14,23 koruuninut.
Ungasianit kiassaanermut akigitinneqartut 4,9 procentinik qaffapput MWh-mut 810 koruuninit 850 koruuninut. Kiassaanermut qaminneqarsinnaasumut akigitinneqartut 3,7 procentinik qaffapput MWh-mut 752 koruuninit 780 koruuninut.
