Nukappissat marluk umiatsiaaqqanik tillittut
Nukappissat marluk angerlarsimaffiup avataanut inissinneqarsimasut piffissap sivikitsup iluani marloriarlutik umiatsiaaqqanik tillittut Qaqortumi politiit tigusaraat.
Allattoq Noah Mølgaard
Nukappissat marluk 16-nik 18-inillu ukiullit Qorlortorsuarmi savaateqarfimmut inissikkallarneqarsimasut ataasinngornermi umiatsiaaqqamik tilleriarlutik nunaqarfimmut Alluitsup Paanukarput.
- Tassani umiatsiaaqqamik allamik tillissinnarlutik Qaqortumut ingerlaqqipput. Ataasinngornermi unnukkut Qaqortumut tikinneranni tigusarineqarput, Qaqortumi politiiniit Oluf Biilmann KNR-mut oqaluttuarpoq.
Nukappissat suli politiinit tigummineqarput pisimasorlu suli paasiniarneqarluni.