Nukappiaqqat misigisaminnik oqaluttuarput
Ulloq unnuarlu angerlarsimaffiusimasumi Tûgdlimmi najugaqartuusimasut, qanoq misigisarsimanertik sassarlutik maanna oqaluttuaraat.
- Siniffimmingaaniit nakkartinnikuaanga avaartillunga, ilisimajunnaatallallungalu.
- Arsaannitsinni misigisarparput, arsamik nakatartittarneq, taamaalilluni timigut qasilittarluni.
- Kivitseriarluta, iikkamut anaarlunneqartarpugut.
Tûgdlimmi najugaqarsimasut, inuusuttut pingasut taamak oqarput.
Nukappiaqqat angallammiit qimaasimagaangata pillaatit, sakkortusarsimapput:
- Tûgdlimioqatikka tamarmik aneqqoriarlugit, sakkortuumik annersalerpaanga. Nukappiaraq taanna sapaatip akunnera aneqqusaassimanngilaq. Ineeqqaminilu mattussaassimalluni, siniffimminilu kisimi nerisinnaasarluni.
- Ilupaqutaannanngorteriarlunga atisakka sulisut inaanut ileriarlugit, innartippaanga. Sapaatip akunnera, ininniippunga aneqqusaananga.
Tûgdlimmi najugaqartut, ullukkut sineqqusaasimanngillat.
- Sinilertoorsimagama, itersarpaanga 5 liiterimik imermik kuillunga. Taamaalillunga innanngaviga taseqqiusalluni, masattuinnarmilu innangatillunga.
Nukappiaqqap Tûgdlimmiinnissani nammineerluni qinigarisimavaa, tusarsimagamiuk Tûgdlimmi sulisunit, Tûgdlik ulloq unnuarlu angerlarsimaffiusoq inuummarissinartoq.
- Tusakkama akerlerluinnaanik pisoqarpoq, sumilluuniit inuummarissinanngilaq.
Tûgdlik matuneqarli, iluaqutaanngilluinnarpoq, nukappiaraq kinaannerminik isertuussisoq taamak oqarpoq.
Uani tusarnaaruk: