Nukappiaqqap niaqqumigut aallaatittup inuunera suli ulorianartorsiorpoq
Angut 50-inik ukiulik nassuerpoq aneerasaartarfimmit quleriit aappaannit 17-inik ukiullip knallertiata tungaanut igissimalluni, knallertit nipiliornerat uumigalugu.
Sakkortuumik saassussisimasutut pasineqarluni sapaatit akunnerini sisamani tigummigallagassanngortinneqarpoq.
Timmiarsiut sakkortuumik naqitsinililk atorlugu angut inuusuttoq 17-inik ukiulik aallaaneqarpoq.
Angut 17-inik ukiulik Odensemi universitethospitaliliaanneqarluni nakorsanit missisorneqarmat niaquani aqerloqartoq paasivaat, aqerlullu taakkua niaquaniittut peerneqarsinnaasimanngillat.
Sønderjyllandimi politiit paasissutissiisartuat Helle Lundberg oqarpoq timmiarsiut atorneqartoq inunnik toqutsinnaasoq.
Danskit inatsisaat nutaaq malillugu allaasinik taama sakkortutigisumik igeriartartunik pisiniaraanni akuerissummik peqqaartariaqarpoq.
Angut 50-inik ukiulik pasineqarluni eqqartuussivimmut sassartinneqarami oqaluttuarpoq timmiarsiummik pigisaqarnissaminut akuersissummik peqarluni, tamannalu maanna politiinit misissorneqarpoq.
Angut 50-inik ukiulik eqqartuussivimmi sassartinneqarluni nassuaanermini angutip 17-inik ukiullip knallertiata tungaanut 30 meterisut ungasitsigisumut igissimalluni inuttaatali tungaanut umersimanani oqarpoq.
Angut iginnermi kingorna inigisaminut isersimavoq.
Angut pasineqartoq politiinit ullaaq killisiorneqarluni nassuiaavoq, ukiuni amerlasuuni ooqattaasariartarsimalluni aallaasillu atornissaat ilisimalluarlugu.
Angut pasineqartoq sakkortuumik saassussisimasutut ulluni 60-ini parnaarussassartitaasinnavoq. Angutip 17-inik ukiullip ikiligaanini anigunngippagu angut 50-inik ukiulik toqutsisimasutut unnerluussaasinnaavoq.
