Nukâka Coster-Waldau aneqqusaaqqilertoq: Coronavirusimik tunillanneqarsimanngitsutut paasineqartoq

Nukâka Coster-Waldau illunnaavalu Silas Holst Vild med dansimi tallimanngormat peqataanngillat.

Tallimanngorpalli peqataaqqilissapput: Illunnaariimmi coronavirusimik tunillanneqarsimanngitsut paasineqarmat, tallimanngorpamiit qiteqataaqqilernissaminnut piareerput.

Tv2.dk taama allappoq.

Nukâka Coster-Waldauip coronavirusimik tunillanneqarsimannginnermut uppernarsaatimi assinga Facebookimi Instagramimilu arfininngormat ullukkut siammarpaa. 

KNR-ip Nukâka Coster-Waldau tallimanngormat apersorniarsimagaluarpaa, iluatsinngitsumilli. Silas Holst TV2-mut ima oqarpoq:

- Aatsaat taama nuannertigisumik tusarlerneqarpunga! Nuannaaqalungalu eqqissiallaqaanga. Aneqqusaaqqilernera Nukâkallu qiteqatigeqqissinnaanngornera nuannaarutigeqaakka. Qiteqatigisartakkavut tallimanngorpat peqataaqqileriaruma naapeqqinnissaat qilanaareqaara. Torrallaalluinnarluta slowfoximik qitinnissatsinnut piareersimavugut.

AAMMA ATUARUK Nukâka Coster-Waldau unnugu Vild med dansimi peqataassanngitsoq

Silas Holstip Karina Frimodtillu coronavirusimik tunillanneqarsimasoq Vild med dansimi peqataanertik saniatigut musicalimi Dirty Dancingimi sulinerminni qanillisimammassuk, Nukâka Coster-Waldau Silas Holstilu angerlarsimaannarsimapput.

Karina Frimodtip illunnaava coronavirusimik tunillanneqarsimanngitsoq aamma paasineqarmat tallimanngorpat aamma qiteqataaqqilissapput. 

Qitinnermik unammisitsineq tallimanngormat unitsinneqarallarmat illunaariit arlaannaallunniit peersitaanngillat.

Tassa imaappoq, illunaariit ajugaaniutivinnissamut anngunniuttut pingasuunatik sisamaassapput.