Nuiki iluatsilluarpoq

Suliniummi Nuikimi nunaqarfinni inuusuttut ilinniagaqalernissaannut ikiornissaat anguniagaavoq, suliniullu maannamut iluatsilluinnartutut oqaatigisariaqarpoq.

Ilinniartut 45-t siorna Nuikimut peqataapput. Nuiki tassaavoq Nunaqarfinni itisilikkamik Piareersarfitsitsineq. Ilinniartunit 45-nit 43-t naammassipput, taakkulu nunaqarfimmiuulluni angujuminaassinnaasartumik ilinniagaqalernissartik maanna sulissutigaat.

Ilinniartut 43-t ilagaat Hans Villads Johansen Kristensen. Taanna 26-nik ukioqarpoq Upernaviullu pigisaani Tasiusameersuulluni.

Suliniummut Nuikimut peqataannginnermini ukiuni arfinilinni atuarsimanngilaq. Upernavimmi niuernermik ilinnialeraluarluni uniinnarsimavoq.

Taanna ullumikkut Sisimiuni najugaqarpoq ilinniarnertuunngorniarfimmilu atuartuulluni. Ilinniartorpassuit Nuiki aqqutigalugu ingerlaqqissimanerannut Hans Villads Johansen Kristensenip ilaatigut makkuninnga peqquteqarnerarpaa.

- Ilaquttat ikinngutillu qimannagit ilinniarnerannut attuumassuteqarunarpoq. Nunaqarfitsik qimannagu ilinniarput, taamaalillutillu angerlarsimaffitsik qimannagu ilinniarsinnaallutik.

Suliniutip Nuikip Piareersarfinnerullu assigiinngissutaasa annerit ilagaat, Nuiki nunaqarfigisaq qimannagu ingerlanneqartarmat.

Palle Lennert Nuikimi suliniummik ingerlatsisut marluusut aapparaat. Taanna oqarpoq suliniutip iluatsilluarneranut pisumasaqaateqartarneq akisussaaffimmillu tigusisinnaaneq pissutaaqataalluinnartut.

- Ilinniartut pimoorunnissaat aallaavigivarput. Nunaqarfinni ilinniartuutitta aammalu ilinniartitsisut akisussaaffimmik tigususinissaannik piumaffigisarpagut. Ilaatigut piffissamik eqquisarnissaannik tatigineqarsinnaanissaannillu piumaffigalugit. Tamatigut takkuttarnissaannik pikkorinnerulernissamillu soqutigisaqarnissaannik piumaffigisarpagut, Palle Lennert oqarpoq.

Hans Villads Johansen Kristensen aamma akisussaaffeqarnerulersimasutut piumaffigineqarnerusutullu misigisimasimavoq.

- Ukioq naallugu, ullut tamaasa, atuarnerup aallartinnissaa minutsinik qulinik sioqqullugu takkuteersimasartussaavugut.

Palle Lennertillu oqaatigaa akisussaaffimmik tigusinissaq inuusuttortatta ajornartorsiutiginerpaasaasa ilagaat.

- Nunatsinni inuusuttut nammineq iliuutsiminnut akissaaffimmik tigusineq ajortut takussaasupilussuupput. Inuusuttortavullu tamatuminnga ilinniartittarpagut. Nammineq iliuutsiminnut akisussaaffimmik tigusisussaapput, Palle Lennert oqarpoq.

Hans Villads siornatigut inuttut ajornartorsiuteqarsimanini atuarnermini aporfigisarsimavaa. Aammali atuagarsornermut tunngatillugu aaqqinniagassaqarsimavoq.

- Ukiuni arfinilinni atuarsimannginnama atuagarsornikkut piginnissaakka tupaallaatigisupilussuuakka. Nuiki aqqutigalugu tamanna qaangersinnaasimavara.

Ullumi ingerlalluartupilussuuvoq, Hans Villads Johansen Kristensenilu Sisimiuni GU-mi maanna atuartuuvoq.

Nuikip taama iluatsilluartiginera Namminersorlutik Oqartussani aamma tupaallaatigineqarsimavoq, taamami isumalluarfigitigisimanngikkaluarpaat.

- Ilinniartormi ataaseq naammassisinnaappat naammagisimagaluarpaat. Uagulli oqarpugut, uagut immikkoortortaqarfitsinni 15-it ilinnialersikkutsigit atuartut tamaasa naammassinissaat ingerlaqqinnissaallu qulakkeerniassallutigu, Palle Lennert naggasiilluni oqarpoq.