Nuaarlorujussuaq Nuup avataani ikkannersuarmi
Angalanermi pissarsiarineqartut ilagaat immap itisuup nuaarlussua 1 kiilutut oqimaatsigisoq. Nuaarlussuaq pisarineqarpoq Nuup avataani ikkannersuarmi Fyllas Bankimi.
Angalasut pisortaata Torkel Gissel Nielsenip oqarnera malillugu angalaneq ilimagisamit pissarsiviulluarsimaneroqaaq, ilisimatuullu 22-t misilittaanerit uuttortaanerillu pilersaarutaasunit amerlanerit suliarisimavaat. Nittartatakkami www.videnskab.dk.-mi tamanna allaaserineqarpoq.
Misilittaanerpassuit maanna misissoqqissaarneqassapput, inernerillu siulliit Kalaallit Nunaanni silap pissusaata allanngoriartornera pillugu ilisimatusarfiup ukiumoortumik novembarimi ataatsimiinnissaani saqqummiunneqassapput. Sikup aakkiartornera, immallu kissakkiartorneri, immami avatangiisinut qanoq sunniuteqarnersut paasiniarneqassasoq siunertaavoq.
- Silap pissusaata aamma issittumi immami inuussutissat uiguleriiaat akornanni sunniivigeqatigiittarneq ilisimaligassatsinnut aamma iluaqutaassapput, Torkel Gissel Nielsen, uumasuaqqanut tappiorannartunut professoriusoq, ilisimasassarsiornermilu pisortaasoq, tikkuaavoq.
Ilisimatuut Nuuk Kangerlua pillugu ilisimatusarnermut atasunik ukiuni aggersuni aamma aviisitigut ilanngutassiisassapput, Nuup Kangerluani pinngortitami ataqatigiinneq nunarsuarmi siammarniassammat.
