Navalnyj oqaloqqissinnaalerpoq: ´Oqaasissai toqutseriarnermut akisussaasuusunut ulorianarsinnaapput´

Ruslandimi politikereq illuatunguliuttoq, Aleksej Navalnyj, Ruslandimi toqunartutortinneqarnermi kingorna pitsanngoriarsimavoq.

Berlinimi nakorsanit sinitsinneqareersorlu ataasinngornermi eqqumaqqilerpoq, oqalussinnaaqqilersimasorlu nalunaarutigineqarluni. Tusagassiorfiit Der Spiegel Bellingcatilu taama allapput.

Navalnyjlu paaralugu isumannaallisaaniat amerlineqarput.

Navalnyj, Sibiriami illoqarfimmit Tomskimit qaammatip siuliani timmisartorluni Moskvaliartilluni perululerpoq. Perululinnginnermi tiitorsimavoq, tiitugaatalu toqunartumik akuneqarsimanissaa ilimagineqarluni.

Navalnyj timmisartumik kingorna Berliniliaanneqarpoq. Napparsimmavimmut Charitémut unitsinneqarpoq, Navalnyj-ly toqunartumik Novichokimik toqunartutortinneqarsimasoq nakorsat tassani paasivaat.

Novichok Ruslandimi sakkutuut isertortumik paasiniaasartunit sorsunnerup nillertup nalaani ineriartortinneqarpoq.

AAMMA ATUARUK Nunat killiit Rusland Putinimik isorinnittup toqunartutortinneqarsimaneranik nassuiaateqaqqugaat

Sibiriaminngaanniit timmisartornermini qanorpiaq pisoqarsimanersoq Navalnyj-p oqaloqqissinnaalernerani paasinarsiumaarpoq, Navalnyj-mi timmisartumut ilaasartaammut angalatilluni nilliaatigaluni iluaallerpoq.

»Oqaasissai toqutseriarnermut akisussaasuusunut ulorianarsinnaapput«. Der Spigel taama ilaatigut allappoq.

Ruslandimi oqartussat pisoq pillugu Tysklandip naalakkersuisuinut nassuiaateqarnissaat Tysklandimi naalakkersuisut piumasarisimavaat.

Ruslandip nunanut allanut ministereqarfia Tysklandip Ruslandimut aallartitaanik Geza Andreas von Geyrimik Moskvami pingasunngornermi aggersaavoq, Tysklandimmi russit naalakkersuisuinik tunngavissaqanngitsunik pasilliinerat pillugu oqaloqatigineqarnissaat Ruslandip kissaatigaa.

Suliap Ruslandip Tysklandillu akornanni pissutsinut ilungersunartorsiortitsilersinnaanera aallartitamut mianersoqqussutigineqartoq, nutaarsiassaqartitsivik Ritzau allappoq.