Nunat killiit Rusland Putinimik isorinnittup toqunartutortinneqarsimaneranik nassuiaateqaqqugaat
Ruslandip præsidentianik isorinnittup Aleksej Navalnyjip toqunartumik Novichokimik toqoriarialuarneqarnera Tysklandimi naalakkersuisut saqqummiutereeraallu, Ruslandimik assuarinnittut imaaginnavipput.
Ruslandimik aqutsisut Navalnyj-mik toqutseriaraluartuunerat allaqqunneqarsinnaanngitsoq, Litauenip nunanut allanut tunngasunut ministeria isumaqarpoq.
- Navalnyj-p Novichokimik toqunartutortinneqarsimanera quarsaarutigaara. Nakorsaataarniarfimmi pisiarineqarsinnaanngilaq. Ruslandimi oqartussat piliaraat.
- Saassussineq misigittaatsuuneruvoq kinguneqartariaqarlunilu, ministeri Twitterikkut taama ilaatigut allappoq.
AAMMA ATUARUK Ruslandimi naalakkersuisunut illuatungiliuttoq suli peruluttoq
Navalnyj-p toqunartutortinneqarsimanerarneqarnera EU-mit aamma assuarineqarpoq, EU-Kommissionillu siulittaasuanit Ursula von der Leyenimit tupaallannartinneqarluni.
- Assuarnarpoq taqassinarlunilu. Pinerluttut akisussaatinneqartariaqarput eqqartuussivitsigullu malersorneqartariaqarlutik, von der Leyen oqarpoq.
Navalnyj-p Ruslandimit toqoriariarluarneqarsimaneranik oqartoqarnera Ruslandimit akuersaarneaarumanngilaq.
- Angutip napparsimalluni Berliniliaanneqannginnerani nunat tamalaat akornanni pissutsit atuuttut aallaavigalugit nunatsinni paasiniaasoqarpoq, toqunartutortitsisoqarsimaneranillu takussutissaqanngilaq, Ruslandip naalakkersuisui sinnerlugit oqaaseqartitaq Dmitrij Peskov oqarpoq.
USA-p sinniisui Navalnyj-p toqunartutortinneqarsimanera aamma assuaraat.