Norwegian Kalaallit Nunaannut timmisartuussisalerusuppoq

- Air Greenlandip akigititaanut sanilliullugit affaannarmik akeqartitsinissaq takorloorparput, Norwegianimi paasissutiinermi pisortaq, Anne- Sissle Skanvik-mut allapoq.

Norwegianimit misissuisut Kalaallit Nunaanni illoqarfiit akornanni Air Greenlandip timmisartuussisarnera nakkutilliineralu piviusunngortitsinissaminnut akunnattoorfigisinnaavaat.

- Illoqarfiit akornanni timmisartuussisarneq Air Greenlandimit aqunneqarnera sukaganersoq ilisimasaqarfigeqqissaanngilarput, tamannalu pilersaarutitsinnik piviusunngortitsinngitsoorutigisinnaavarput, Anne-Sissel Skanvik akissuteqarnermini allappoq.

Air Greenland timmisartuussinikkut unammilleqatigiinnerup kingunerisaanik ajornartorsiorpoq, aningaasartuutikillisaasaariaqarnerullu kingunerisaanik soraarsitsilluni.

- Piffissami angallaffiunerpaasumi, Air Greenlandip aningaasarsiorfigisaani, unammilleqatigiinneq sakkortuvoq, oktobarimi novembarimilu aningaasanik isaatitsisinnaanerput ajornangajalluinnarpoq, Air Greenlandip pisortaa, Michael Binzer sulisunik soraarsitsinermut tunngaviit pillugit oqaaseqarami taama tunngavilersuivoq.

Timmisartuussinermilu unammilleqatigiinneq siunissami minnerulernavianngilaq. Timmisartuutileqatigiiffit Cimber Sterling Danmarkip Kalaallit Nunaatalu akornani timmisartuussisalernissaq pilersaaruteqarfigaa, taassumalu saniatigut Air Iceland aamma aasaanerani timmisartuussisareerluni.