Norskeq aningaasaatilissuaq nuliaminik tammaaneqartumik toqutsisimasutut pasineqartoq

Norgemiup, Anne-Elisabeth Hagensip tammaaneqarneranut suliaq - tammaaneqalerneranit ukioq ataaseq affaalu qaangiuttullu allamik sammiveqalerpoq.

Norgemiut politiivisa tammaaneqartup uia, niuertarfiutilik aningaasaatilissuarlu, Tom Hagen tigusarisimallugu tusagassiortunik katersortitsinermi oqaatigaat.

Taanna toqutsisimasutut toqutseqataasimasutulluunniit pasineqarpoq.

Anne-Elisabeth Hagen 2018-imi oktobarip qaammataani tammarpoq. Tassunga atatillugu kinaaneranit ilisimaneqanngitsumit allakkamik arnap iperagaanissaanut aningaasanik akiliuteqaqqussuteqarpoq. 

Aningaasanillu akiliuteqaqqussut pinerluuteqarnermut malunnarunnaarsaataasimasoq politiit nalilerpaat.

AAMMA ATUARUK Norgemiup aningaasaatilissuup nulia aallarunneqartoq

- Allatut oqaatigalugu politiit suliaq paasissaajunnaarsitsiniarnermik ersarissumik pilersaarusiugaasoraat.

- Politiit misissuineranni isummiussaagaluartut inerneqannginneranni politiit Tom Hagenimut pasitsaassaqarnerat annertusiartorsimasoq, misissueqqissaartut siuttuat, Tommy Brøsk tusagassiortunik katersortitsinermi oqarpoq.

Norgemi politiit suliaq, Anne-Elisabeth Hagenip toqutaasimanissaa ilimagalugu 2019-imi aasakkut suliarilerpaat.

Tom Hagenili nuliamik toqutsisimaguni sumik pissuteqarsinnaanerani politiit oqaaseqarfigisinnaanngilaat.

- Qanoq ilisoqarsimasinnaaneranut annerusumik oqaaseqarsinnaanngilagut, poltiiit oqarput.

Unnerluussisussaatitaasup, Åse Kjurstad Erikssonip Tom Hagen sapaatini-akunnerni sisamani parnaarussivimmi tigummigallarneqarnissaa piumasariniarlugu tusagassiortunik katersortitsinermi oqaatigaa.

Tom Hagen inatsit tunngaviusoq naapertorlugu pingasunngornermi killisiorneqassaaq.