Norgep nunanut allanut ministeria peqataanngitsoorumanngivippoq

- Norge naalagaaffiuvoq imaanut sineriaqartoq, taamaattumillu tamanna immikkut pingaaruteqarluni. Taamaattumik peqataanissara ilungersuuppara. Tamanna feeriarnissamut sukkulluunniit akornutaasinnaanngilaq, Jonas Gahr Støre Politikenimut oqarpoq.

Politikenimi allaatigisaq malillugu Norgep nunanut allanut ministeriata poorskimi feeriaqarnissani kinguartippaa ataatsimiinnermi, aammattaaq Naalakkersuisut siulittaasuata Kuupik Kleistip Danmarkip aallartitaasa ilaattut peqataaffigisaani, peqataajumalluni. Aammattaaq USA-p Ruslandillu nunanut allanut ministerii ataatsimiinnermi peqataapput.

Lene Espersen siornatigut Danmarkimi nunanut allanut ministeriusarsimasunit arlalinnit, Uffe Elleman-Jensenimik siuttoqartunit sakkortuumik isornartorsiorneqarpoq, taakkua isumaqarlutik taassuma qallunaat kalaallillu Qalasersuarmi soqutigisaat peqataannginnermigut sumiginnarsimagai.

Nunanut allanut ministeri nammineq nassuiaavoq tamatumani "inissisimaneq pillugu ataatsimiinneq" aalajangiiffiusinnaanngitsoq pineqartoq aammalu ataatsiminneq "pisortat ataatsimiinnerinngikkaat".

Norgelli nunanut allanut ministeriata Arbejderpartimeersup ataatsimiinnerup pingaaruteqarnerata nikassarneqannginnissaa mianersoqqussutigaa.

- Ataatsimiinneq pingaaruteqanngitsoq isumaqassalluni kukkuneruvoq. Aalajangiinerit pingaarnerit maannakkorpiaq ilusilersorneqaleruttorput, imaanngitsoq aatsaat ukiorpassuit qaangiuppata taamaalissasut amerlaqisut isumaliornerattut. Uatsinnut naalagaaffittut imaanut sineriaqartunut tamatuma sapinngisamik piaarnerpaamik inissinnissaa taamaattumik pingaaruteqarpoq, aviisimut taama oqarpoq.