Norgemiu aalisartoq Issittumi Sakkutooqarfimmit nunaliaanneqartoq
Taamaattumik Islandimi sinerissami nakkutilliisoqarfimmit issittumi sakkutooqarfik qinnuigineqarpoq Norgemiut
umiarsuaanni ajoqusersimasoq nakorsanit passunneqarniassammat piaartumik aaneqarnissaanik
misissueqqullugit.
Timmisartuutileqatigiiffik Air Greenland Issittumilu Sakkutooqarfik attaveqatigereermata isumaqatigiissutigineqarpoq, Air Greenlandip annassiniarnermi qulimiguujutaa S-61 Kangerlussuarmiittoq Norgemiut umiarsuuaannut Tasiilap kujataaniittumukassasoq.
Qulimiguulik sermersuaq qulaallugu ingerlareerluni Tasiilamilu orsersoreerluni, qulimiguulik norgemiut umiarsuaannut arfinninngornermi unnukkut apuuppoq.
Mallerpallaarnerali pissutigalugu ajoqusersimasoq umiarsuarmit kivittaamik qulimiguulimmut
kivinneqarsinnaasimanngimmat qulimiguulik Tasiilamukaannartariaqarsimavoq.
Norgemiut umiarsuaat arfininngornerup unnuaani Tasiilamut qanillattorniarluni Tasiilap avannaanut pivoq, sapaammilu ullaakkut qulimiguulik umiarsuarmut anngummat, ajoqusersimasoq qulimiguulimmut kivinneqarpoq,
kingornalu Tasiilami peqqinnissaqarfimmukaanneqarpoq tassanilu passunneqarluni, Issittumi Sakkutooqarfik
Facebookimi quppernerminni taama oqaluttuarput.