Omikron nualluutinit allanit tunillaassuutijanerusoq naqissuserniarlugu, nunarsuatsinni tamani ilisimatuut suli sullipput.Assi: Daniel Beloumou Olomo/AFP/Ritzau Scanpix

Norgemi ilisimatuup Omikron nunarsuarmi tunillaassuuttup qaangernissaanut periarfissiisorigaa

Piffissap ingerlanerani coronavirus nualluutinut nalinginnaasunut sanillersuunneqartalissasoq, Norgemi ilisimatuut suleqatigiit siuttuat isuamaqarpoq.

Coronammi allannguutaa sakkukinnerusumik sunniuttartoq, uloriagineqartup tuniluunnerata qaangernissaanut aqqutissiuisinnaavoq.

Oslo Universitet-imi, nualluutit assigiinngitsut, Omikron aamma Delta, misissorniarlugit  ilisimatuut suleqatigiit siuttuat, ilisimatooq Gunnveig Grødeland, oqarpoq.

Nualluutip nutaap, Omikronip, qaammat kingulleq nanineqarnerata kingorna paasisat siulliit takutippaat taanna tunillaatiararsuusoq.

Taassumanngali tunillatsittut akornanni toqusartut napparsimmavinniittullu pillugit kisitsisit ilimagisamit amerliartornerunngillat.

- Coronap allannguutaa sukkanerusumik tuniluuttarlunilu sakkukinnnerusumik sunniuttartoq, tassa uagut nassaarerusutarput, ilisimatuut siuttuat Stavanger Aftenbladetimut oqarpoq.

Nualluut nutaaq taama ittoq, inuiaqatigiit akornanni killilersuisariaarunnissamut aqqutaasinnaasoq, ilisimatuut isumaqarput.

AAMMA ATUARUK Nakorsaaneq: 2022 naallugu, immaqalu sivisunerusumik, corona eqqartussavarput

- Coronavirus, qanoq sakkortugisumik sunniuttarnermigut nualluutitunut nalinginnaasunut sanilliunneqarsinnaalissagunarpoq. Maannakkut paasisat naapertorlugit taanna nualluut nutaaq, nualluutip ulorianartup tuniluunnerata qaangernissaanut aqqutissiuisuussaaq, Gunnveig Grødeland oqarpoq.

Omikron nappaatigalugu ulorianartorsiorsinnaasut qanoq sunnertittarnersut kiisalu akiuussutissat qanoq iluaqutaasinnaatiginersut, ilisimatuut Norgemiut misissorpaat.

Omikron nualluutinit allanit tunillaassuutijanerusoq naqissuserniarlugu, nunarsuatsinni tamani ilisimatuut suli sullipput.

Ukiortaaq qanillippat nappaat pillugu ilisimatunerulerumaartugut, tuluit virusit pillugit immikkut ilisimasallit isumaqarput.

Danmark-imi aamma Statens Serum Institut-imi nakorsaanerup, Anders Fomsgaardip oqaatiginikuuaa, Omikron sakkukinnerusumik sunniuttaruni nualluummillu Delta-mit tuniluutijaneruguni iluaqutaalluarsinnaasoq.

- Omikron, nualluummit Deltamit tuniluutijanerullunilu sakkortuneerusumik napparsimassutigineqartaruni, soorunami ajussaaq, sakkukinnerusumilli napparsimassutaasaruni immaqa iluaqutaaginnarsinnaavoq.

- Utoqqarnut sanngiitsunullu tuniluulluni sakkukinnerusumik napparsimatitsisarluni akiuussutissamik siaruaassisinnaassaaq, Anders Fomsgaard aviisimut Information-imut oqarnikuuvoq.

Danmark-imiinnaq Omikron-imik tunillatsittut 261-it nalunaarsorneqareerput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl