Norge illersornissaqarfimminut 385 milliardit koruunit missaannik aningaasaliinerulersaartoq
Norgemi illersornissaqarfik Norgemiut aningaasaannik 600 milliardit koruuninik ukiuni tulliuttuni aqqaneq-marlunni aningaasaliivigineqarnerulissaaq, tassa danskit aningaasaannik 385 milliardit koruunit missaannik aningaasaliivigineqarnerussalluni.
- Europami nunanilu allani sillimaniarnikkut politikkikkut ilungersunarnerusoqalernerata nalaani illersornissaqarfimmut aningaasaliissutit ukioq mannamut naleqqiullugu 83 procentinik qaffaavigineqassaaq, Norgemi naalakkersuisut nalunaarutaanni ilaatigut allassimavoq.
- Illersornissaqarfimmut aningaasaliissutit aatsaat taama qaffaavigineqartigissapput, illersornissaqarfimmilu immikkoortut tamaasa aningaasaliivigineqarnerussapput, Norgep ministeriunera Jonas Gahr Støre oqarpoq.
Sakkutuut ataatsimoortut brigadit marlunnik ilaneqassapput, tamarmik immikkut sakkutuunik 3000-t 5000-llu akornanni sakkutooqassallutik. Tassa sakkutuut ataatsimoortut Norgep avannaani Finnmarkimi, Norgellu kujasissuani inissisimassallutik.
Norgemi sakkutuut imarsiortut umiarsuaat ikinnerpaamik tallimanik aamma ilaneqassapput, soorlu aamma aqqartartut tallimanik ilaneqarniartut.
