Nunat avannarliit paasissutissiisarfiat allaffeqarfimmik ammaasoq
Aammattaaq kalaallit nunani avannarlerni nunamut allamut nuukkusuttut siunnersorneqartassapput.
Nunat Avannarliit Ministerinut Siunnersuisoqatigiiffiata paasissutissiisarfia Hallo Norden 1998-imiilli atuutilersinneqarpoq. Nunanilu namminersortitani Ålandimi Savalimmiunilu 2011-mi 2012-imilu allaffeqarfinnik ammaavoq.
Nunatsinni ukiormanna 2015-imi taamaasilluni aamma ammaavoq, allaffeqarfittaarlu NAPA-mi, Nunat Avannarliit Piorsarsimassutsikkut Attaveqaataanni, inissisimassaaq.
Allaffeqarfik pingasunngorpat pisortatigoortumik ammaanersiorneqassaaq, nunanilu avannarlernik suleqateqarnermut naalakkersuisoq Doris Jakobsen aamma NAPA-p pisortaa Mats Bjerde tikilluaqqusissapput.
AAMMA ATUARUK Hallo Norden Nunatsinni allaffeqalissaaq
Doris Jakobsenip allaffeqarfimmik ammaasoqarnera nuannaarutigaa.
- Inuusuttortavut Nunani Avannarlerni allani ilinniagaqarsinnaanerat nammineerluta iluaqutigisorujussuuarput taamaattumillu Nunani Avannarlerni innuttaaqatitta taamatut nuunnissamut ajornannginnerulersitsinnaasumik maannakkut neqerooruteqarfigisinnaaleratsigit nuannaartorujussuuvunga, Doris Jakobsen tusagassiorfinnut nalunaarummi ilaatigut taama allappoq.
NAPA-p pisortaata Sverigemiup Mats Bjerdep nunasisunut paasissutissiisarfeqalernera aamma nuannaarutigaa.
Taassuma Nunatta nunanit avannarlernit allaanerunera aamma tikkuarpaa.
- Kalaallit Nunaat assigiinngitsorpassuartigut torraasupilussuuvoq nunanullu avannarlernut allanut naleqqiullugu allaanerujussuulluni. Issittumi pinngortitaq, naggueqatigiit inuit kulturiat kalaallillu oqaasii immikkuullareqqissaartuupput, NAPA-p paasissutissiisarfittaassap allaffeqartinneranut tunuliaqutaasoq pillugu Mats Bjerde taama oqarpoq.