Hallo Norden Nunatsinni allaffeqalissaaq
- Nunani avannarlerni tamani avannaamioqatigiit paasissutissiisarfiannik neqerooruteqarnissamut Kalaallit Nunaat kisiat amigaatigineqarpoq. Allaffeqarfittaassaq tikilluaqquarput nunanilu avannarlerni pitsaasumik ineriartortoqarneranut takussutissatut isigalutigu, Nunat Avannarliit Ministerinut Siunnersuisoqatigiiffianni qullersaq Dagfinn Høybråten taama oqarpoq.
Hallo Nordenip nunani avannarlerni nuttarnermut, sulinermut ilinniarnermullu periarfissat pillugit paasissutissiisarfiuvoq. Hallo Norden nunanilu avannarlerni tallimani 1998-imiilli allaffeqarfeqalerpoq, Ålandimi Savalimmiunilu 2011-mi 2012-imi aamma ammaalluni - maannalu tassa Nunatsinni aamma ammaasussanngorpoq.
Paasissutissat pissarsiariumarnerulissapput
- Nunanit avannarlernit tamanit sulisussarnissaq kissaatigalugu Kalaallit Nunaata suliniut eqeersimaartumik peqataaffigaa. Paasissutissiisarfeqalerneratigut, assersuutigalugu Finlandimiut Sverigemiulluunniit Kalaallit Nunaanni pissutsit pillugit paasineqarnissaat ajornannginnerulissaaq, soorlu ilaquttat nooqatigissagaanni, Nunat Avannarliit Ministeriisa Siunnersuisoqatigiiffianni siunnersortaaneq Marita Hoydal taama oqarpoq.
- Uanga Sverigemit Kalaallit Nunaannut nuunneruvunga, tassungalu atatillugu paasissutissiisarfik atorluakutsoorsinnaasimagaluarlugu. Paasissutissanik tamanik aallerfigineqarsinnaallunilu ikiuutaasinnaasoq iluaqutaakutsuussaaq, Nuummi NAPA-mi pisortaq Mats Bjerde taama oqarpoq.
