Nora: Periarfissanik atorluaannginneq nutserarnermik kinguneqartarpoq

Jørn Hansen Nunani avannarlerni nunat immikkoortuini isorliunerusuni nuttarneq qitiutillugu isumasioqatigiinnermi, peqataavoq.

- Kalaallit nunaanni, Savalimmiuni, Islandimi Norgemilu nunatta pissarititaanik tunisassiornissamik nunaqarfinnut tulluarsaanissaq pikkoriffigisimanngilarput. Kiisalu nunaqarfimmiut namminneq ileqqui periusaallu atorlugit ingerlatsinissaannut periarfissittarsimanagit. Tamanna mumikkaani isumaqarpunga iluatsittumik ingerlatsisoqarsinnaasoq, Jørn Hansen oqarpoq.

Sarfannguani Itillimilu tunisassiorfiit assersuutigai:

- Sisimiuni Inuussutissarsiornermi ataatsimiititaliamiit Sarfannguani Itillimilu tunitsiviit nunaqarfimmiunit aqunneqartussanngorlugit 1996-mi sulissutigisimavarput, iluatsippullu! Arctic Green Foodip ingerlakkallarmagit ukiup affaa uninngasartut, ullumikkut ukioq kaajallallugu sapaatip akunneranut saarulliit tarajortikkat 70 tonsit tunisassiaraat, Jørn Hansen oqarpoq.

Islandimi Savalimmiunilu innuttaasut nunat pissarititaannik akikinnerusumik pisiniarsinnaanissaat politikkerit immikkut ittumik inatsisiliornerisigut periarfissaatinneqarpoq.

- Islandimiut Savalimmiormiullu namminneq tunisassiaminnik niuernermut immikkut tulluarsakkaminnik inatsisiliornikuupput, inatsit EU-p piumasaqaataanut naleqqussagaq atorlugu akigititat akisuallaaqimmata innuttaasut akissaqartinngimmatigit, Jørn Hansen oqarpoq.

Nora tassaavoq, Nunani avannarlerni ministerådep, nunat immikkoortuinut, politikkikkut suleqatigiissitaliaa.