Noma neriniartarfinni pitsaanersaaqqippoq

Toqqaaneq Tuluit Nunaanni ippassaq pivoq, Nomamilu igasoq René Redzepi suleqataalu akissarsisinneqaramik vikingetut niaqorornaveeqquteqarput, nersornaaserneqarnertillu nuannaarutigeqaat.

Neriniartarfik Noma Københavnimi Illu Atlantikumut atavoq, Kalaallit Nunaata Danmarkimi allaffeqarfia, Danmarkskontoret, peqatigalugu, nerisassaatinilu Kalaallit Nunaanniit, Savalimmiuniit Islandimiilluunniit pisut, nunarsuaq tamakkerlugu tusaamaneqaatigai.

- Ajugaaqqippugut, ataatsimoorlutalu taamaaliorpugut. Pitsaanerpaavugut. Neriuppunga ukioq ataaseq suli nammassinnaagitsigut, iggavimmi pisortaq nersornaatisinermik kinguninngua sulisuminut oqarpoq. Aviisimi B.T.-mi tamanna allaaserineqarpoq.

Normu 2-nngorpoq spaniamiut neriniartarfiutaat El Celler de Can Roca, normu 3-nngorlunilu aamma spaniamiut neriniartarfiutaat Mugaritz, taakku marluullutik Spaniamiipput.

Neriniartarfiup aqqa Noma oqaatsit marluk atorlugit taaguutaavoq, "nunani avannarlerni" "nerisassat". Nerisassanillu Nunanit Avannarlerneersunik soqutigisallit neriniartarfik atorluartaqaat, naak inniminniinissaminnut qaammatit pingasut missaat utaqqisariaqartaraluarlutik.

Inuit 100.000-it qaammatit tamaasa inniminniiniarsarisarput, Nomalu tassa nerniartarfiit "nunarsuarmi pitsaanersaattut" ukioq ataaseq kingumut taasinnaalerpoq.