Nobelip eqqissinermut nersornaasiuttagaa 2016 Colombiap præsidentianut tunniunneqartoq

Nobelip komitéata ullaaq manna nalunaaqutaq arfineq-marlunut pisortatigoortumik nalunaarutigaa Columbiami præsidenti, Juan Manuel Santos, nunami inuisa ukiuni qulikkuutaani arlalinni imminnut sorsuunneranni eqqisseqatigiinnissamik sulissuteqarnini pillugu Nobelip eqqissinermut nersornaasiuttagaanik tunineqartoq.

Santosip akersuunnermi sivisoorsuarmi aassunneqisumilu inuit 120.000-it toqutaaffigisimasaata kingorna, pikitsitsiniaqatigiiffik Farc ukioq manna eqqisseqatigiinnissamik isumaqatigiissuteqarfigaa.

- Norgemi Nobelip komitéata Nobelip ukioq manna eqqissinermut nersornaasiuttagaanik præsident Juan Manuel Santosimut tunniussinikkut Columbiami eqqisseqatigiinnissamik, saammaateqatigiinnissamik naapertuilluarnermillu ilungersuuteqartut tamaasa kajumissaaserusuppai, Nobelip komitéata siulittaasua, Kace Kullman Five, taama oqarpoq.

Eqqisseqatigiinnissamik isumaqatigiissut Columbiami qinersisartunit amerlanerussuteqalaartunit sapaatit-akunnerata naanerani itigartinneqarpoq, Juan Manuel Santosili nunamini eqqissiviilliorfiusumi eqqisseqatigiinnissamik ilungersuuteqarnerminut maanna nersorniarneqarpoq.

Nobelip eqqissinermut nersornaasiuttagaa 1901-miilli tunniunneqartalerpoq, tunineqarsimasullu oqaluttuarisaanermut pingaarutillit ilagaat Theodore Roosevelt, Martin Luther King aamma Mother Theresa.

Nersornaasiinermi saqqarmiuliisoqarpoq, diplominnatsitsisoqarluni kiisalu Sverigemiut aningaasaataannik 8 millionit koruuninik tunissuteqartoqarluni.