Nivissat ujaminnattut siulliit

Snowboardertartoq Jonas Strømsted ajugaasut qaqisarfianni qullersanngorpoq, ippassarmi arctic airertoqarnerani kuultinnakkami. Taassuma saniatigut aamma marlunnik bronzinnareerpoq.

Arnat unammisartut ajugaasut qaqisarfiannut qaiqisinnaanngortut oqaluttuarisinnaavagut. Mia Fleischer 15-inik ukioqartoq Dene Gamesini finger pullimi ippassaq sølvinnappoq, Nivi Nielsenilu aamma tassani bronzinnappoq.

Peqatigitillugu kalaallit Inuit Gamesimut Dene Gamesimullu peqataatitasat ujaminnassimapput. Aqqalu Sørensen 20-nik ukioqartoq Inuit Gamesimi unammissutini airplanemi one hand reachimilu marlunnik sølvinnappoq. Jens Jørgen Lange ippassaq aamma ujaminnaqqippoq, finger pullimi bronzinnakkami. Taamatuttaaq Tonny Fisker one foot high kickimi ippassaq ujaminnaqqippoq finger pullimilu bronzinnalluni. Aamma pingasunngormat triple jumpimi bronzinnappoq maannamullu sisamanik ujaminnassimalluni. Ujaminnattamilu ataatsimik ilaqqinnissai ilimagaa.

Kalaallit nerrivimmi arsaarartartuisa angusaqarluarnissaat ilimagineqarpoq. Aallarniutaasumik unamminerit 16-it ingerlanneqareernerini unammisartut marlukkuutaartullu 15-it semifinalinut ingerlaqqipput.

Nunanut allanut unammisartut sungiusaasuata Niels Nielsenip kalaallit ullumikkut ajugaaniutivittoqarnerani qulinik ujaminnannissaat eqqoriarpaa.

- Unammillertitta annersaat tassaapput Ruslandimeersut, taakkulu semifinalini unammisussaavagut. Kalaallit unammisartut Nunavummiunut Nunavimmiunillu pikkorinnerungaatsiartut paasiavarput, taama KNR-imut oqarpoq.

Nerrivimmi arsaartartoq Ivik Nielsen ippassaq timersornikkut takutitsilluartutut saqqarmiulerneqarpoq. Dommerit AWG-p nunani tamalaani ataatsimiititaliaa peqatigalugu taama ittumik saqqarmiuliisarput.