Niviarsiaqqat oqaloqatigiilluarnerusarput

Meeqqat pillugit siorna oktobarimi ataatsimeersuartoqareermat nalunaarusiaq suliarineqarpoq. Nalunaarusiortut tassaapput SFI, atugarissaarnissamut misissuisoqarfik, tassaallutillu meeqqanut inuusuttunullu ilisimasanik nutaanik katersuisuusut.

Nuummi atuartut 70-it 8. aamma 9. klassineersut nalunaarusiami aallaavigineqarput.

Nalunaarusiaq atuarlugu niviarsiaqqat peqatiminnik oqaloqateqarnerusartut paasinarpoq, niviarsiaqqalli nukappiaqqallu ajornartorsiutitik pillugit oqaloqateqarnissartik tamarmik ajornakusoornerarpaat.

Angajoqqaat inuttut ajornartorsiutinik aaqqeeriartussaasutut akisussaaffeqartutut inuusuttuaqqat tamangajammik isumaqarfigaat, tigussaasunilli aaqqiissutissaasinnaasunik siunnersuutissaqarpiaratik.

Inuusuttuaqqammi una akissutigigajuttarpaat: Imerpallaannginniaraanni imminut aqussinnaasariaqarpoq. Imerpallaarunnaarniaraannili qanorpiaq imminut aqutsisoqartassanersoq arlaannaataluunniit siunnersuutissaqartinngilaa.

- Taamaammat qanoq iliornissamut iliuusaasinnaasut siunissami suliniummi aallunneqarnerussapput, tassalu suut ajortuunersut suullu ajunngitsuunersut kisimik samminagit, ilisimatusartoq Else Christensen nalunaarusiortoq taama oqarpoq.

Suliniut Nakuusa tassaavoq Namminersorlutik oqartussat UNICEF Danmarkillu ataatsimoorussamik suliniutaat ukiuni tallimani ingerlasussaq, nunatsinnilu meeqqat inuusuttuaqqallu pisinnaatitaaffiisa pitsanngorsarneqarnissaanik atugarisaatalu pitsaanerulernerinik kinguneqarniartussaq.