Niviarsiaqqap toqunera misissuiffigineqassaaq

Niviarsiaqqap toqunera pinngitsoorneqarsimasinnaagaluartoq illoqarfimmi innuttaasut arlaqartut isumaqarput, taamaammallu inuit 50-it missaannittut peqqinnissaqarfimmut akerliussutsimik takutitsiniarlutik aqqusinikkut ullumi ingerlaaqatigiissamaarput.

Niviarsiaraq novembarip qaammataani naamigut annialersimavoq, marloriarlunilu nakorsiaanneqarsimagaluarluni, anniarneranulli patsisaasoq paaseqqaarnagu angerlartinneqartarsimavoq.

Januaarip ingerlanerani angajoqqaavisa nakorsaq attavigeqqikkamikku ilisimatinneqarput, 39 sinnerlugu kissarneqalerpat aggiuteqqissagaat, niviarsiaqqap arnaa oqaluttuarpoq.

Niviarsiaraq taanna qulinik ukiulik januaarip aqqaneq-aappaanni toquvoq, qipinngulussimasorlu kingorna paasineqarpoq.

Pisup qanoq ingerlasimanerata misissorneqarnera napparsimmaviup aallartissimavaa.

- Politiit maanna akuliutsinneqarsimalerput suliarlu misissuiffiginiaraat naatsorsuutigineqarsinnaalluni. Peqqinnissamik nakkutilliisoqarfimmi nakorsaaneq aamma akulerutsinneqarsinnaasoq naatsorsuutigineqarsinnaavoq, Narsami nakorsat qullersarigallagaat Stein Nygård oqarpoq.

Narsami suliaq pillugu ilisimatinneqarsimalluni peqqinissamik nakkutilliisoq Flemming Kleist Stenz oqarpoq, nunatsinnilu nakorsaanermut angajoqqaajusut naammagittaalliummik nassitsinianngippata, misissuinissamut nammineq sulissuteqarniarpoq.