Nivi Olsen: Sorlaap oqartussanit tapiiffigineqartarnera pisarnertut ingerlaannassaaq
Sorlammut aappaagumut tapiissutit ukioq mannatut amerlatigissasut, naalakkersuisoq aamma naqissusiivoq.
Nivi Olsenip eqqaamaqquaa, Tipsernermit Lottornermillu tapiissutit Pulje B-tut taaneqartartut, 2014-ip naaneraniit, isumaqatigiissut naapertorlugu, Sorlaap tamanna akisussaaffigiunnaarmagu, tamannali naalakkersuisoqarfimmit akisussaaffigineqalersimasoq oqarluni.
Taamaakkaluartoq Sorlak suliniutitik pillugit aningaasanik qinnuteqarsinnaasoq, Nivi Olsenip allanngunnginnerarpaa.
- Meeqqanut inuusuttuaqqanullu suliniutit inuiaqatigiinnullu pingaaruteqartut, Sorlaallu siuliuteqartarneranut pingaaruteqartut soorlu højskolertitsisarneq, imminut toquttarnerup pinaveersaatinneqarnissaanut tunngasut aamma meeqqat inuusuttuaqqallu susassaqartinneqrnissaannut tunngasut pillugit Sorlak tapiissutinik qinnuteqarsinnaavoq, Naalakkersuisoq oqarpoq.
Sorlammut tapiissutigineqartartut ikinnerulersinneqarnissaannik tusatsiakkat pillugit, Partii Naleraq aamma tamassuminnga isornartoriuisunut ilaapput.
- Partii Naleraq aningaasanut inatsisissaq pillugu isumaqatigiinniarnermut ilaajumanngeriarluni taama isornartorsiuineri paasisinnaanngilara. Taamaattumik ajunnginnerussagaluarpoq aningaasanut inatsisissap isumaqatigiinniutigineqarneranut ilaallutik tamanna oqaaseqarfigigunikku tusagassiuutit aqqutiginagit, Naalakkersuisoq Nivi Olsen tusagassiuutinut nalunaarummini ilaatigut taama aamma allappoq.