Nivi Olsen: Nittartakkatigut oqallinnerit pissusilersuutillu kusanaatsut eqqumaffigineqarnerullik
"Aallaasilerlusi akerliussutsimik takutitseqqinniaritsi napparsimanngilagunngooq ooriutitsinnik arsaartuinnaavippaatigut"
”Nivi kisivit meeraqalaanngilatit - akornaniittuuguma aallaaqqajaqaara.”
"Atortittartup meerai" (meeqqami assiganut oqaasertaliussat)
"Mikiarlutit toquinnarit, arnapalaaq maajunnartoq"
Nivi Olsenip Facebokkimi naammattoortagaasa ilaat taamaapput.
- Facebookkimi tamakku allatat tassaapput toqqaannartumik toqqaannanngitsumillu uannut allaaserineqarsimasut ilaat. Taamannak allattaneq torersuusorinngilara. Allaniillu isumaqatigineqarnissara ilimagaara.
Nivi Olsen, Inatsisartut ukiakkut ataatsimiinnissaannut siunnersuummini taama allappoq.
Siunnersuuteqarnermigullu kisimiinnaanngitsoq inunnilli allanik aamma misigisaqartoqartartoq ilisimallugu siunnersuutimini allappoq.
- Nittartakkatigut inuinnaat naapittarfianni allat aamma nakkarsaagaanermik misigisaqartartut nalunngilara. Facebookimi pissusilunneq ulluinnarsiutaavoq, nittartakkatigut inuinnaat naapittarfiini allani aamma taamaattoqartassasoq, ilimagaara, Nivi Olsen allappoq.
Nittartakkatigut inuinnaat naapittarfiini oqalliseriaasiannuinnaq tunngasumik paasititsiniaasoqasasoq taassuma siunnersuutigaa.
Paasititsiniaanerup suliarinera minnerpaamik 250.000 koruuninik naleqassasoq naatsorsuutigineqarpoq.
Siunnersuut Inatsisartut ukiakkut ataatsimiinneranni novembarip ulluisa aqqarnani oqaluuserineqassaaq.
AAMMA ATUARUK Demokraatit siulittaasuat eqqartuussivimmiissasoq: Toqumik sioorasaarneqarpunga
Nivi Olsen toqunneqarnissamik facebokikkut siorasaarneqarnerminik eqqartuussivimmut suliassanngortisinikuuvoq.
