Nivi naalakkersuisuni nuannarineqarnerpaasoq
Naalakkersuisunilu ilaasortat akornanni arnat nuannarineqarnerpaasut kisitsisit takutippaat, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Nivi Olsen, Demokraatineersoq, Ilaqutariinnermullu, Naligiissitaanermullu Isumaginninnermullu Naalakkersuisoq Martha Lund Olsen, Siumumeersoq, nuannarineqarpaallutik.
Naalakkersuisut siulittaasuat Kim Kielsen, Aningaasaqarnermut Aatsitassanullu Naalakkersuisoq Andreas Uldum, manna sulinngiffeqarallartoq, nuannarineqarnerpaat pingajuattut sisamaattullu inissisimapput.
Naalakkersuisut nutaat qanoq ingerlatsinersut HS Analysep misissuinermini nalilersoqqusimavaa, 1-imiit 5-imut nalilersoqqullugit, 1 ajornerpaalluni, 5-ilu pitsaanerpaalluni, naalakkersuisunullu ilaasortat ataasiakkaat qanoq nalilerneritsik aamma apeqqutigisimallugu, siulianitullu 1-imiit 5-imut nalilersoqqusimallugit.
Naalakkersuisut ataatsimut isigalugit 2,6-imik karakteerilerneqarsimapput, Ilinniartitaanermut Naalakkersuisoq Nivi Olsen nuannarineqarnerpaalluni agguaqatigiissillugit 3,6-imik karakteerinnattoq, Martha Lund Olsenilu tulliulluni 3,3-mik karakteerinnattoq.
Peqqissutsimut Naalakkersuisup Doris Jakobsenip, Aalisarnermullu Naalakkersuisup Karl-Kristian Krusep karakteerii appasinnerpaapput, tamarmik agguaqatigiissillugit 2,5-imik karakteerilerneqarsimammata, Vittus Qujaukitsoq aamma Knud Kristiansen tulliullutik agguaqatigiissillugit 2,6-inik karakteerilerneqarsimasut.
