Nive tusaamasarsuanngulerpoq

Nive Nielsen guitarialu ukulele Nunatsinni tusarsaasut ilangilluinnalereerpaat. Erinarsugaalu nunani avannarlerni ullumimiit aamma tusarnaarneqarsinnaalerput, tassami nuuseeraliaa kingulleq, Nive Sings saqqummersitsisarfik, Playground saqqummiisoralugu ullumi saqqummersinneqarmat.

- Taama tigulluarneqarnera qujanarpoq, Nive Nielsen maanna Belgiamiittoq KNR-mit taama oqartipparput.

Nive Nielsenip nuuteeraliaa, nunat avannarlermiunit tusarnaarneqaannassanngilaq aammali nunani allani tusarnaarneqartalissaaq. Qaammatip tulliata ingerlanerani nuuteeraq Tysklandimi, Grækenlandimi, Belgiami, Frankrigimi, Hollandimi, Tuluit Nunaanni, Spaniami, Italiami aamma Japanimi saqqummersinneqassaaq.

Nuuteeqqamillu allamik saqqummersitsinissaminut Nive Nielsen pilersaalereerpoq.

- Ukioq manna ulapissaqaagut. Qanittukkut Spanialiassaanga erinarsuutinik nutaanik sanajartorlunga. Sapaatip akunerata tulliani nuuteeraq Spaniami Grækenlandimilu saqqummersinneqassaaq. Spaniameereerutta nunatsinnut uteqqissaagut tusarnaartitsissalluta.

Nive Nielsen nipilersortartunilu USA-mi qanittukkut nipilersoqattaareerlutik utereersimalerput, ilaatigut nipilersortartut nunarsuatsinni tusarnaartitsisartut 1000-it festivaleqarneranni, South By Southwestimit pitsaanerit qulit akornanniittutut nalilerneqareerlutik.

Nunanut allanut tusarnaartitsiartoqattaarnissaalli akornuserneqaraluarpoq.

- Nunat inoqqaavi Canadami tusarnaartitseqatigeriarlugit unillatsiarnitsinni Vangoverimut sisorariama, tassani singernera napisoorlugu, qujanartumilli assakka napinagit, taamaattumik tusarnaartitsisarnigut ajunngittumik ingerlapput, Nive Nielsen oqarpoq.

Pituffik Qaanaarlu Nive Nielsenip juunimi tusarnaartitsivigissavai, siullermilli maajip 26-anni Odensemi kalaallit qallunaallu, Nive Nielsenimit nuannisartinneqassapput, Odense Havnekulturfestivalimi peqataassagami.