Nive Roskildemi appisimaarpoq

Roskilde Festivalimi tusarnaartitsisarfik Pavillion Junior ammarlugu Nive Nielsen and The Deer Children tusarnaartitsipput. Nive Nielsen pisarnermik rockernerulluni tupersuup eqqaaniittut tusarnaariat 400-t missaanniittut nuannisaartippai.

2005-imi Roskilde Festivaleqarmat Angu tusarnaartitsivoq, tamatumalu kingorna aatsaat kalaallimik tusarnaartitsisoqaqqilluni. Kalaallit nipilersortartut nunani assigiinngitsuni  festivalinut aggersarneqartartut, Roskilde Festivalimut aggersarneqartannginnertik pillugu isornartorsiuisarput.Taamaakkaluartoq Nive Nielsen ilumikkersimanngilaq. Taassuma nipilersornissaminut periarfissinneqarsimanini nuannariinnarpaa.

- Roskilde qangali meeraallugali tusaamasarigakku uannut immikkut malunnaateqarpoq.

Nivep tusarnaartitsinini iluatsilluarsoraa:

-  Kalaallit erfalasui arlaqartut tusarnaartitsinerma nalaani takuakka, nuannisaarpaseqaallu.

Ullumikkut tusarnaartitsinerat taamaatiinnarneqagajavissimavoq, tassami Belgiamiit Roskildep tungaanut ippassaq aatsaat aallarput, bussialli aqqutaani aseroraluarluni,  tassalu tamanna pissutigalugu nalunaaquttap akunnerinik arfineq-pingasunik kinguaattoorlutik Roskildemut apuupput.

Roskilde Festivali Nunani Avannarlerni annersaavoq, ukioq manna tusarnaariat 80.000-it missaanniipput, taakku saniatigut aningaasarsiaqaatiginagu ikiuuttut 25.000-it missaanniillutik.

Roskilde Festivali sisamanngorpat aallartivissaaq. Nive Nielsenip  aappani Jan de Vroede ilagalugu, tusarnaartitseqattaarnertik nangillugu Iqalunnut White Horsemullu ingerlaqqissaaq.