Nive nunarsuatsinni tusarnaartitsiartoqqilerpoq

Kalaaleq arnaq erinarsortartoq nuannarineqarluartoq Nive Nielsen nipilersortuilu The Deer Children 2011-mi angalanissatik aallartillugit Nunatsinni sapaatip akunnerani matumani tusarnaartitseqqaassapput.
Allattoq Elisa Isaksen
februaarip 07-at 2011 04:15

Nive Nielsen nutaamik CD-liornermi saniatigut, nipilersortartoq kalaaleq alla nunani allani maluginiarneqarluartoq Simon Lynge peqatigalugu Nunatsinni sapaatip akunnerani matumani marloriarlutik tusarnaartitsiniarput.

Angalanertik aallartillugu pingasunngorpat februaarip qulingiluaanni Simon Lyngep illoqarfiani Qaqortumi nipilersussapput, tallimanngornermilu Nuummi Katuami nipilersussallutik. Nive Nielsen tusarnaartitsinermini pulaartoqassaaq erinarsukkanillu nutaanik saqqummiussissalluni.

Tamatuma kingorna Nive Nielsen Nunatsinni tusarnaartitsinavianngikkallarpoq, tassami Skandinaviami, Tuluit Nunaanni, USA-mi Canadamilu tusarnaartitsiartoqattaarluni angalasussaagami.

Nunani avannarlerni festivalerfigineqartartumi Larm-imi Oslomiittumi februaarip qiteqqunnerani arlaleriarluni tusarnaartitsissaaq aamma Københavnimi Huset i Magstrædemi februaarip 21-anni tusarnaartitsissalluni.

Aqaguani Aarhusimi Musikcafeen-imi tusarnaartitseriarluni Nive Nielsen Tuluit Nunaaliassaaq. Matsimilu USA-mi aamma Canadami angalassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq