Nive Nielsen nersornaammut innersuunneqarpoq
Nunat Avannaamioqatigiit Nipilersortartunut Nersornaasiuttagaa 2011-mi agguaanneqalerpat qulequtaassaaq: "Nipilersortartoq immikkuullarissoq, nipilersoriaatsimini nutaaliorsimasoq, pilersaarutaanngitsutut ittumik saqqummiussisarnermigut nutaaliortoq nipimillu alutornartumik tusagassaqartitsisoq.
Nersornaatisisussaq tassaassaaq Nunat Avannaamioqatigiit imaluunniit nunarsuup sinnerani nipilersornerup silarsuaani ukiup kingulliup iluani maluginiarneqarsimasoq.
Nipilersortartumik Nersornaasiuttakkamut tunngasumik nittartagaliortoqarsimavoq, ilaatigut nipilersortartut erinarsortartulluunniit nersornaatisisussatut innersuunneqartut tusarnaarneqarsinnaaffianni, immaqalu nittartakkanut allanut saqqummiunneqarfiannut ingerlaqqiffiusinnaasumik.
Nunat Avannaamioqatigiit Nipilersortartunut Nersornaasiuttagaanik 2011-imi tigusisussap aqqa juunip aallaqqaataani saqqummiunneqassaaq, inuttaanut tunniunneqassalluni Nunani Avannarlerni aallartitat Københavnimi novembarimi ataatsimiinneranni.
