Niuffaffissat allat ujartoqquai
Peqqussummi piumasaqaatitut oqaasertaliussami ilaatigut ima allaqqasoqaraluarpoq: ”Puisinit nioqqutissiat inuiaqatigiit inuit ileqquusumik piniartarnerannit pisuusut inuuniarnermullu siunertaqartut malittarisassani ukunani inerteqqutaasunut ilaassanngillat”. tamannali Kalaallit Nunaanniit avammut puisit amiinik nioqquteqarnermi ammit nalunaaqqutsersorneqartanerisigut atatillugu arlalitsigut allannguisoqarnernik kinguneqassaaq.
- Allagartalersuineq sakkortoqisumik piumasaqaataalluni ingerlanneqassaaq, piffissamilu qaninnerusumi Kalaallit Nunanni tamanna qanoq aaqqissuunneqassanersoq eqqarsaatigisariaqarpoq, Finn Karlsen tusagassiuutinut nalunaarummi allappoq.
Allagartalersuinerit atuutilernerisa kingunerisaanik aningaasatigut qanoq kinguneqartitsissanersoq suli ilisimaneqanngilaq.
Peqqussulli atuutilersoq WTO-mi, nunat tamalaat niueqatigiinnikkut suleqatigiiffiata, maleruagassaanut naapertuutinngilaq, Finn Karlsen aamma allappoq.
- Puisit amiinik suliffeqarfiit kaammattussavakka niuffaffinnut allanut EU-p avataaniittunut isiginiarneroqqullugit, niuerfissatut periarfissaapput Rusland, Kina aamma Kangiani nunat allat, Finn Karlsen allappoq.
2008-mut aningaasanut inatsimmi 29,9 millioni koruuninik puisit amiinut tapiissuteqartoqarnissaanut aningaasaliisoqarnikuuvoq.