Nittartakkatigut attaveqarniarnerup ajornakusoornera erloqititsivoq

Tamannalu ilungersunartuusoq IT-eqarnikkut ingerlatsinermut aqutsisup oqaatigaa.

- Suliat naammassineqarsinnaannginneri, paasissutissanik tunniussisinnaannginneq allanillu apuussisinnaannginneq erloqinartupilussuuvoq, Tony Ditlevsdal oqarpoq.

Januaarip qaammataa naalersoq Namminersorlutik Oqartussani sulisut ilaata qarasaasiani virusilik atorlugu Namminersorlutik Oqartussat e-mailia iserfigimmagu mailit tusindilippassuit nassiussuunneqarsimapput.

Taamaattoqarnerani Microsoftip Namminersorlutik Oqartussat mailiat mattuppaat, nanoq.gl-imit nassiussisoqarsinnaajunnaarlugu.

Sulianullu tamanna sunniuteqartoq Namminersorlutik Oqartussanit oqaatigineqarpoq.

- Microsoft ullut tamaasa oqarasuaatikkut attaveqarfigisaqattaarparput, ajornartorsiutip qanoq nalunaarutigineqarnissaanut nittartakkatigut innersuussutip malippagut virusilu aaqqinneqareersimasoq nalunaarutigalugu. Qaammatinngulerpoq taamaaliorluta.

AAMMA ATUARUK Mattussineq sillimaniarnermut ilaavoq

Innuttaasut tallimararterutaat attaveqarfigineqarsinnaanngitsut Akileraartarnermut Aqutsisoqarfiup missilioraa IT-eqarnikkut ingerlatsinermut aqutsisup oqaatigaa.

- Ilungersunartupilussuuvoq. Soorlu SKAT-imut nammineq nalunaarsuummi aaqqitassaqarpat saaffiginnikkaluaruit akineqarsinnaanngilatit. Nassiussiguit soorlu assigiinnaraa siunertaqanngitsumut miloriussiinnarluni, Tony Ditlevsdal oqarpoq.

Innuttaasut attaveqarfigineqassappata oqarasuaatikkut taamaallaat pisinnaavoq, attaveqaqatigiissimanermulli takussutissaqarsinnaanaviarani. Allakkatigullu aamma nassiussisoqarsinnaagaluartoq sivisuallaarsorineqarpoq, ullummi arlerlugit apuunniartarmata.

AAMMA ATUARUK Microsoftip Naalakkersuisut blacklistersimavai

Microsoftip mattusseqqanini atorunnaartinnissaata tungaanut Namminersorlutik Oqartussat attaveqarfigerusukkaanni mailimik nutaamik sanaqqaarluni, assersuutigalugu googlemi, attaveqartoqarsinnaasoq innersuutigineqarpoq.

Qarasaasianit virusilinnit nassiussisoqartillugu mattunneqartarneri naliginnaasuusut Microsoftip nassuiaatigaa. Namminersorlutillu Oqartussat erngertumik ikiorneqarsimannginneri ajuusaarutiginerarpaat.