Namminersorlutik Oqartussat: Microsoftip Naalakkersuisut blacklistersimavai

Namminersorlutik Oqartussat IT-mut immikkoortortaqarfiat tusagassiorfinnut nalunaaruteqarluni taama allappoq.

Tamatumunnga pissutaavoq Namminersorlutik Oqartussani sulisut ilaata nammineq qarasaasiani atorlugu Namminersorlutik Oqartussat webmailiannut januaarip qaammataa naalersoq isersimasimammat. Sunaaffa qarasaasiaq taanna malwarenik imaqarsimasoq, tamannalu pissutigalugu Namminersorlutik Oqartussanit mailit tusintilippassuit nassiussuunneqarsimallutik.

Malewaret qarasaasiamit tassannga pisut Namminersorlutik Oqartussanit akunnerit arlaqanngitsut qaangiummata unitsinneqarput Microsoftilu ingerlaannaq attavigineqarpoq ajornartorsiut aaqqinneqartoq nalunaarutigalugu, Namminersorlutillu Oqartussat mailsystemiat ajoquteqarunnaartoq unnerlugu.

Taamaakkaluartoq innuttaasut ilaat Namminersorlutik Oqartussanut suli attaveqarsinnaanngillat. Attaveqarsinnaanngitsullu mailinik nassiussuillutik kiffartuussivinnit makkuninnga atuisuupput: hotmail, livemail aamma Outlook.dk

Ajornartorsiullu annertuvoq, tassami innuttaasut amerlasuut mailitik piffissami kingullermi allanngortittariaqarsimavaat maili nunatsinni atugaasoq greennet.gl atorunnaarmat.  

Ajornartorsiutip sammineqarnera KNR-ip kingusinnerusukkut ingerlateqqissavaa.