Microsoft: Mattussineq sillimaniarnermut ilaavoq

Namminersorlutik Oqartussat e-mailikkut virusimik  januaarip qaammataani eqqorneqarput. 

Namminersorlutik Oqartussani sulisut innuttaasunut allakkanik digitaliusunik e-mailikkut nassiussisinnaajunnaarallarput, Microsoftimmi sulisut e-mailii virusimit ajoqusersorneqartut mattuteqqavai.

E-mailinillu viruseqalersimasunik mattussineq sillimaniarnermi malittarisassanut ilaasoq, Microsoft allappoq:

- Atuisup emailia atornerlunneqarnissaa pinaveersaartinniarlugu mattussisarpugut, Microsoft allappoq.

AAMMA ATUARUK Microsoftip Naalakkersuisut blacklistersimavai

Viruseerunneralu qulakkeerneqareerpat Microsoftip mattussineq aatsaat atorunnaarsissinnaavaa.

Namminersorlutik Oqartussani IT-qarnikkut ingerlatsinermut aqutsisoq, Tony Ditlevsdal, naapertorlugu mattussineq taanna januaarimili atorunnaarsinniarlugu sulissutigineqalerpoq.

Mattusseqqaannartariaqarnertillu ajuusaarutigigitsik, Microsoft KNR-imut mailikkut allappoq.

- IT-qarnikkut aqutsisup ikiorsiisarfipput oqaloqatigisimagaa paasivara, ikiorsiisarfittalu ikiuussinnaasimannginnera ajuusaarutigaarput. Kaammattuutigaarput taassuma saaffiginninnermi normuni atorlugu attavigissagaatigut, taamaalilluta suliaq misissuiffigilluarsinnaalissagatsigu, Microsoft Danmark allappoq.

Innuttaasut hotmailimik, livemailimik outlook.dk-millu e-maileqartut tassaapput Namminersorlutik Oqartussanit mailimik nassiussarsisinnaajunnaarallarput.