Aatsaavissuaq nalaanneqartoq: Issittumi nittaarujussuarsimanera pinngortitamut kinguneqartoq
Umimmaat piaraat toqorarput, timmissat manniliunngillat, sullerngit naasunut kingusinaarlutik pujoralatseripput.
2018-mi nittaassimanerujussua piffissami sivisuumi sunniutigisinnaasaa ilisimatuut suli paasinngilaat, siunissamilu silap pissusiata allanngoriartorneratigut nittaarujussuartassappat Issittumi pinngortitap ataqatigiinneranut sutigut tamatigut kinguneqarsinnaanera pineqarpoq.
- Issittumi uumasut naasullu naleqqussallaqqissorujussuupput taamaassinaasimanngikkunimmi issittorujussuarmi uumasinnaasimanavianngillat. Imaanngilarli ukiup ataatsip ingerlanerani ukiorluusimanerata kingunerisaanik suna tamarmi ajalusoortinneqartoq, ilisimatuut ilaat misissuinermin nutaami suleqataasoq Niels Martin Schmidt, Aarhusip universitetani ilisimatuujunerusoq, Videnskab.dk-mut taama oqarpoq.
Issittoq juunip qaammataani upernartarpoq apullu aalluni. Juulimili aggusitimilu aasartarpoq, sullerngillu naasunut qaammatit marluinnaat ingerlaneranni pujoralatserisussaapput, naasut sikkertussaapput, timmissat sullinertortussapput manniliorlutillu, terianniat timmissat piaraannik nerisussaapput piaqqatillu perorsarlugit aammalu umimmaat naasortortussaapput piaqqatillu perorsarlugit.
Ukiuunerani nittaassimanerujussua aputillu juunip qaammataani aanngitsoornera aammalu juulip qaammataata tungaanut aputeqarnera 2018-mi aasakkut ajornartorsiutaapput.
Suut tamarmik soorlu naasut, kikkaasut ilaat narlumukaat, umimmaat, timmissat, niviukkat, ippernat terianniallu eqqorneqarput.
- Uumasut assigiinngitsut amerlassutsimikkut nikerartartut ilisimaneqareerpoq, Tamannali Issittumi pinngortitap ataqatigiinneranut sutigut tamatigut kinguneqarpoq. Siornatigut taama pisoqarsimanngisaannarpoq, Niels Martin Schmidt taama oqarpoq.
Silap 2018-mi immikkut illuinnartumik pissuseqarnera siunissami pisussanut ilimasaarutaasinnaasutut Niels Martin Schmidtip nalilerpaa.
Silap pissusiata allanngoriartornerani maannakkut pisut immikkut illuinnartunik pisoqaqattaarneranik kinguneqassapput. Issittumilu pinngortitap ataqatigiinnerata pissusissamisuuleqqinnissaa Niels Martin Schmidtip ilimagaa, ukiunili tulliuttuni taama ingasatsigisumik sakkortutigisumillu malittuinnarnik pisoqartassappat pinngortitap ataqatigiinnera ajalusoorataannaasoq Niels Martin Schmidtip qularinerarpaa.
2018-mi nittaassimanerujussuata kingunerisai aatsaat ukiut arlaqartut qaangiuppata takusinnaanngussavagut, pinngortitallu ataqatigiinnerata ilaa assigiinngitsut pissusissamisuuleqqikkumaarnersoq paasissavarput. Timmissat ingerlaartartut ukiut arlallit aatsaat qaangiuppata nalinginnaasumik amerlassuseqaleqqikkumaartut naatsorsuutigineqarpoq, piffissamilu tassani assingusumik pisumut assingusumik nalaataqaqqissanersut apeqqutaavoq, Niels Martin Schmidt oqarpoq.
Niels Martin Schmidt aamma oqaluttuarpoq, ilisimatuut uumasunik naasunillu misissuisarfiup ataatsip eqqaani taamaallaat ilisimatuussutsikkut kisitsisimagaluartut Issittumi Qalasersuarmi tamarmi ingammik Issittup avannarpasinnerusortaani 2018-mi ukiukkut nittaassimasorujussuusoq, Danmarkimi silasiorfiup DMI-p paasissutissaatani takuneqarsinnaasimavoq.
