Nipittuutivillugu tusarnaartitsissapput
Akeqanngitsumik tusarnaartitsinermi Inussivimmi unnugu arfineq-marlunut qiteqquppat aallartittussami, checki 250.000 koruuninik imalik suliniaqatigiiffimmut Nanu Meeqqanut tunniunneqassaaq.
Erinarsoqatigiinni siuttup aappaanut Nuummi mittarfimmut tikinnissaq immikkulaaq ittussaavoq. Nina Kreutzmann Jørgensen Nuummi atuarfimmi namminersortumi Nuuk International Friskolemi qallunaat oqaasinik nipilersornermillu atuartitsisarpoq, 6. klassinullu klasselæreriulluni.
- Ninap uternissaa qilanaarisorujussuuarput, atuartut oqarput, taakkumi Nina qaammatini pingasuni takusimanngilaat. Taamaattumik tikilluaqqusilluarniarlutik atuarfitsik pinnersarsimavaat.
Atuarfimmi atuartut tamarmik ullaap tungaani mittarfiliakaaniarput Ninamullu immikkut ittumik tupaallatsitsiniarlutik. Tassami erinarsoqatigiit mippata atuartut qaqqap innaaniissapput naqinnernillu oqaasinngortitsillutik tigumiassallutik, ilinniartitsisoq maqaaseqisartik tikilluaqquniarlugu.
Inussivimmi unnugu nalunaaqutaq 18.30 akeqanngitsumik tusarnaartitsinissaq nalliuttorsiorpalaartoq Katuamit, Nunatsinni Takornariaqarnermi Inuussutissarsiornermilu Siunnersuisoqatigiinnit Air Greenlandimillu aaqqissuussaassaaq. Nuummi borgmesteri Asii Chemnitz Narup oqalugiarluni aallarniissaaq tamatumalu kingorna Julie AllStarsikkut nipittuutivillugu erinarsussapput.
