Nipisat suaat qerisut piumaneqarluartut

Nipisat suaat Nunatsinneersut nunani allani piumaneqarneruleriartorput. Matumanilu igalaaminernik puullit Tysklandimi tunisassiarineqartartut pineqanngillat - mikisunilli puullit nutaajutillugit qeritinneqartartut.
Allattoq Inge S. Rasmussen
juulip 27-at 2015 07:29
Nutserisoq Simon Uldum -

Tamannalu Royal Greenlandimi Paamiunilu suliffissuarmi mianersortumik isumallualersitsivoq.

Nipisat suaat aappalaartut soqutigineqarneruleriartorput.

Ilaatigut Naalakkersuisut siulittaasuata Kim Kielsenip ukiaq qineqqusaartoqarmat nipisat suaat sammivai Danmarkimilu akigitinneqartut isornartorsiorlugit.

Royal Greenland naapertorlugu nipisat suaannik tunisassioriaaseq nutaaq - tassalu qeritillugit - nunani allani soqutigineqaleriartuinnarpoq.

Tunisassiornermi pisortap Niels Wannip atugassiami Navigatiomi oqaluttuaraa nipisat suaat qerisut aalisakkanik suliffeqarfissuup Japanimi suleqatigisaata pissanganartittupilussuugaat. Containerimimmi ilivitsumik piniareersimapput.

AAMMA ATUARUK Nipitsat suaat Paamiuni suliffissaqarfitsipput

Nunatsinnilu nipisat suanniarneq puijuaannartitsinissaq tunngavigalugu ingerlanneqartutut MSC-mik allagartalerneqariarpat suaat tuniniarnissaat ajornannginnerulissaaq.

Pingaartumimmi Europami pisisartut imarmiunik piujuaannartitsinissaq tunngavigalugu pisarineqartartunik nioqqutissiat soqutigisupilussuuaat, tunisassiornermi pisortaq nassuiaavoq.

Nipisat suaat igalaaminernik puullit qalipaasigaapput, taratsigaallutik kissallugillu bakteriaajagaallutik, nipisallu suaat qerisut tarajuligaanngillat. Pisisartullu namminneerlutik taratsersuisarnissaat pinerullugu taamatut tunisassiaapput.

Nioqqutissiallu taama ittut Skandinaviamiut piumasupilussuuaat. Tassalu nioqqutissiat sapinngisamik akuutissalersugaatinnagit suliaasut.

- Nioqqutissiat akuutissalersugaanngitsut pisisartut pisiariumaneruaat, atuagassiami Navigatiomi kategorichef Lise-Lotte Calsøe York taama oqarpoq.

Paamiuni nipisat suaannik tunisassiorneq ukioq manna 50 tonsinut annerusarneqarsimavoq 20-nillu sulisoqarluni.

Tunisassiornerlu annertusaqqinneqarsinnaassappat tamanna suliffinnik amerlanerusunik pilersitsissaaq, tamannali Paamiuni illoqarfinniluunniit allani pissanersoq maannakkorpiaq oqaatigineqarsinnaanngilaq.

- Nioqqutissiaq isumalluarfigaarput, maannakkorpiarli qanoq isumalluarfigitigissanerlugu oqaatigisinnaanngikkallarparput, atuagassiami Navigatiomi kategorichef Lise-Lotte Calsøe York taama oqarpoq.

Nunatsinnilu atuisartut nipisat suaat qerisut Paamiuni tunisassiarineqartut siornatuulli pisiarisinnaassavaat, siornatigummi kissallugit bakteriaajaakkat Cuxhavenimi tunisassiarineqartut kisiisa Nunatsinni pisiarineqarsinnaagaluarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk