Nipisat suaasa akii assortuussutaasut
Nipisat suaat nunani allani piumaneqarluartuupput, taamaattumillu nunatsinni tunisaasut ingerlalluartut ilagaat.
Royal Greenlandip Nuummi nipisat suaasa akii apriilip arfernaniit allanngortippai, tassalu kg-mut 26 koruuneqalerlutik, siornatigut 15 koruunit missaanni akeqarsimagaluartut.
Tamannalu Nuummi KNAPP-mi siulersuisut iluarinngilaat.
- Imminuinnaq eqqarsaatiginata, uagut Aalisartut peqatigiiffianni siulersuisutut tamaviaarutigiuassavarput nunatta sinnerani suanniartut aamma akitigut taama pineqassasut, Johannes Heilmann oqarpoq.
Royal Greenlandimiilli nassuiaatigineqarpoq unammillerneq tunngavigalugu taama aaqqiisimallutik.
- Akit manna atuutsilikkavut siornamut naleqqiullugit qaffasinnerupput, Nuummilu qaffasinnerupput pissutigalugu Nuuk unammillerfiummat, Royal Greenlandimi tusagassiisartoq Sivert Amondsen oqarpoq.
KNAPP-miilli Johannes Heilmann qalleqqissaalluni oqarpoq, sinerissami akitigut assigiinngisitsineq pissusissamisunngilluinnartoq. Taamaattoq Royal Greenlandi aalisartunit naammagittaalliortunit saaffigineqarsimannginnerarpoq.
Ilanngutassiaq unnugu Qanoruumi takujuk.
