Nipisanut aki isumaqatigiissutigeqqajaavaat

Suaallu Royal Greenlandimut tunineqarneranni qanoq akeqartinneqarnissaat pillugu isumaqatigiissutissaq naammasseqqajaasoq, Royal Greenland neriorsuivoq.

Isumaqatigiissulli suli naammassineqarsimanngimmat, KNAPK iluarisimaarinninngeqaaq.

- Aalisartut utaqqikatapput. Ukioq naallugu tunitsivissaqarsimanngitsut ingerlasinnaasimanngillat. Tassalu arnarluit takkupput, taava aalajangerpugut tunisineq aallartiinnarniarlutigu, KNAPK-p pisortaata tullia Tønnes Berthelsen taama oqarpoq.

Taanna naapertorlugu Royal Greenlandimut isumaqatigiinniarnerit pisariusimapput, tassani tunisassiornermut pisortaq Danmarkimi najugaqarmat.

- Isumaqatigiinniarnerit ingerlanikuupput. Soorunami internet atorlugu ingerlasinaapput, kisianni tamatigut naammanneq ajorami. Pissutigalugu, isumaqatigiinniaqatissarput Danmarkimi najugaqarmat.

Royal Greenlandimi pisortaq, Jens K. Lyberth, KNAPK-mi tusagassiutitigut isumaqatigiinniaqateqarumanngilaq. KNR-imulli oqarpoq, illua-tungeriik maanna oqaloqatigiilluartut. Isumaqatigiissullu ullualuit qaangiuppata naammassissasoq naatsorsuutigaa.

Royal Greenland Narsami Nuummilu nipisanik pisiortulaareersimavoq. Taakkualu kilomut 17 koruunilersorlugit pisiarisimagitik, Jens K. Lyberth ilisimatitsivoq.

Akilu taanna KNAPK-ip maannakkorpiaq akueriinnarallarsimavaa. Tønnes Berthelsen oqarpoq, KNAPK piviusorsiortumik pissusilersortoq nalunngikkitsillu, nipisannik tunitsiviit tatisimaneqartut. Kisianni neriupput, akigitineqartut qaffanneqarsinaasut:

- Aallartissalluta, KNAPK-mi isumaqatigiiginnarpugut. Taavalu aki neqeroorutaanikoq 17 koruunit atorlugu tunisineq aallartissaaq. Royal Greenlandilu isumaqatigiippugut, kingusinnerusukkut akimik anginerusumik isumaqatigiissagutta, taava taakkua nalimmassarneqarumaartut, tunisat siulliit ilaatillugit, KNAPK pisortaata tullia Tønnes berthelse oqarpoq.

Nipisanniarneq apiilip aallartinerani aallartikkajupput, Kujataani siullermik, taava avannarpasinnerusormiut aamma tullinnguuttarlutik.