Nannumik nunatsinni illoqarfiit eqqaannut tikiuttoqarneranik nalunaartut aasaq manna ullut tamaluinnangajaasa tusarsaapput, nannullu tikiuttut alutorineqarniarlutillu ernummataapput.

Nannumik Avannaani Tunumilu siumuisoqartarnera tusarnartaanngilaq, nannumilli taakkunaniinngaanngitsoq aammali Kujataani Kitaanilu aasaq manna siumuisoqalaavippoq.

Taamaannera nunakkut pisunniartut aallartinnatik sillimanerunissaannik malitseqarpoq.

Nina Lindholdt Jørgensen taakkununnga ilaavoq. Taanna Kujataani nunakkut aasaq manna pisunniarpoq. Nannumik tikiuttoqartarnerata aasaq manna tusarsaakularnera aarleritsaatigisimallugu taanna nassuerpoq.

- Soorunami aarlerilaarpunga. Taamaammat sumunnarfissami inuia piukkussaannik ajunaalernermi seqqortaammik attartulersaarpugut, taanna oqarpoq.

Nina Lindholdt Jørgensen angutaannilu Nuummi najugaqarlunilu nakorsiartarfimmi sulisuuvoq.

Nannumik Nuup eqqaani siumuisoqaqqammeraluartoq nunakkut pisuttuaraangami aallaasisartanngilaq.

Aallaasisartariaqarataannaavorli, nannumimmi siumuiffiusimasup eqqaani nunakkut pisunniat aallaasisarnissaat oqartussanit innersuunneqarpoq.

- Aallaammik atuinermik misilittagakippunga. Angutaatiga misilittagaqarnerulaarpoq. Innersuussulli malillugu aallaasisartariaqartalertussaassaagut, Nina Lindholdt Jørgensen oqarpoq.

Oqartussat najoqqutassiutsiarlik

Nannumik sumiiffigisami eqqaaniluunniit siumuisoqarsimanersoq sumiiffigisap inuinut aperinissaq siumuisoqarsimaneranilluunniit Facebookimi nalunaartoqarsimanersoq alaatsinaannissaq, aamma innersuussutigineqarpoq.

Nina Lindholdt Jørgensenip inuit ilisimasaat misilittagaallu soorunami tusarusuppai, oqartussalli nannunik tikiuttoqakulanera eqqaagaanni aamma saqquminerusariaqarlutillu nannumik siumuigaanni qanoq iliornissamik najoqqutassiortariaqarsorai.

- Soorunami nammineq alaatsinaattussaavugut. Oqartussalli Facebookimi Instagramimilu alaatsinnaaqqusiinnarnatik najoqqutassiorunik qujanassaqaaq, taanna oqarpoq.

Nannunik Kujataanut aasaq manna pisarnerminngarnit tikuttoqarnerungaatsiartoq, Kalaallit Nunaanni politiit KNR-imut oqarput. Tamanna Pinngortitalerimmeersut oqarnerat naapertorlugu Kujataani aasaq manna pisarnerminngarnit sikorsuaqarneroqineranik pissuteqarpoq.

Nina nunatsinni sumiiffinnut assigiinngitsunut angalasareernikuuvoq, Kujataali aasaq manna siullermik tutissallugu. Assi © : Privat.

Ilumut qimaassanngilanga?

Nannumilli siumuigaanni palliguppallu qimaalertunnginnissaq, nilliarnissarli nipiliornissarlu innersuussutigineqarpoq.

Nina Lindholdt Jørgensen nannumik uumasussivissuarmi taamaallaat takunninnikuuvoq. Taamaammat nannumik siumuissagaluaruni eqqissisimaannassanerluni qimaannginnissamillu innersuussummik malinnissanerluni nalornisigaa.

- Nannumik siumuinermi qimaalertunnginnissaq innersuussutaasoq tusarnikuuara, taamali nalaassigaluaruma ilumut qimaanaveersaarsinnaanerlunga eqqarsaatigisarpara. Taamaammat nipiliortitsiinnarluta qimaasaarinissaq naammassorinngilara. Aallaasisarnissaq nipituumilluunniit ajunaalernermi seqqortaasisarnissaq pisariaqarpoq, taanna oqarpoq.

Aalisarnermut nakkutilliisoqarfik nannumik siumuisoqartillugu pinartoqaraangat ornigutilertornissamut upalungaarsimasoqartoq, Aalisarnermut Piniarnermullu Naalakkersuisoqarfik KNR-imut ilisimatitsivoq.

Naalakkersuisoqarfiup upalungaarsimasui 48 25 20-mut sianerfigalugit ulloq unnuarlu attavigineqarsinnaapput.

Oqartussat upalungaarsimasui ornigutilertorsinnaanngippata, kikkulluunniit nannumik siumuisut siumugaat upanninniarpasippat upannippalluunniit naalakkersuisoqarfimmit akuerineqaqqaanngikkaluarlutik imminnut illersorumallutik aallaannissinnaatitaapput.