Nipilersukkat, oqalugiarnerit AWG-imilu timersortartut: Kalaallit Nunaat Tivolimi sorpassuarnik sammisassaqartitsissaaq

Tivolimi aaqqissuussap ilisimaneqarluartup 47-ussaannik matuni, juulip 31-iani ammassavai.

Allattoq Paarnannguaq Nielsen

juulip 22-at 2024 13:51

Kalaallit Nunaat Tivolimi, Danmarkimi Københavnimi pisartoq ullut qulingiluat qaangiuppata aallartissaaq, inuillu peqataasussat makkua qilanaartuutigisinnaavaat:

-Ukioq manna peqataasussat qilanaartuutigisinnaasaat assigiinngillat, qujanartumik ukioq manna ukiut kingulliit timersorneq ilanngunnikuuaarput, siorna soorlu avannaata qimussersuani pissartaq persuarsiutigineqartoq ukioq manna Arctic Sport Greenlandimi timersullammassuit nuannaarutigissuavut, persuarsioqatigissuagut, taakkua saniatigut nipilersortussangut plænenimi appisimaassapput.

Kalaallit Nunaat Tivolimi saqqummiisartoq Carsten Siegstad oqarpoq.

Timersorneq kisimi sammineqassanngilaq, pisarnertummi aliikkusersuisoqarlunilu nipilersortoqassaaq. Pisarnermiilli allaanerusumik ullut aallartinneqartassasut Carsten Siegstadip ilanngullugu oqaatigaa.

Kalaallit Nunaat Tivolimi 2024 pilersaarutit naatsumik:

31.juli Pingasunngorneq

14:00 – 14:30 Ib & Anda Uldum (Isiginnaartitsiviup saavani)

16.00-16.20 Quiasaarisartoq Piitannguaq Alaufesen (Isiginnaartitsiviup saavani)

17.00-17.45 Erinarsoqatigiit Sarpik (Isiginnaartitsiviup saavani)

19.00-20.00 Tomba Jam (Isiginnaartitsiviup saavani)

20.30-21.15 Muusi (Isiginnaartitsiviup saavani)

21.35-22.58 Sauwestari (Isiginnaartitsiviup saavani)

01.aug Sisamanngorneq

17.00-17.45 Erinarsoqatigiit Sarpik (Isiginnaartitsiviup saavani)

18.30-19.15 Muusi (Isiginnaartitsiviup saavani)

19.15-19.30 Quiasaarisartoq Piitannguaq Alaufesen (Isiginnaartitsiviup saavani)

20.00-21.00 Tomba Jam (Isiginnaartitsiviup saavani)

21.30-22.58 Ole Kristiansen NIpilersoqatinilu (Isiginnaartitsiviup saavani)

Allisiguk

-Ukioq manna immaqa oqarsinnaavugut allaanerulaartumik pilersaarpugut, tassa ualikkut immaqa annertunerusumik inuit ilassiortissuagut taamaattorli aamma susassaqartitsivugut soorlu paasissutissanik oqalugiartut, arlalissuupput taakkua ullup ingerlanerani paarlakaallutik oqalugiartartussat, taanna oqarpoq.

Oqalugiarnerit nunatta oqaluttuarisaaneranut nunatsinnilu ilisimatusarnermut tunngassuteqartut allat oqalugiaatigineqartassapput. Kalaallit Tivolimi naapeqatigiinneranni aamma nunanit tamalaanersut peqataasarnerat peqqutaalluni isumassarsiaq tamanna pilersinneqarsimasoq, Carsten Siegstadip KNR-imut oqaatigaa.

Ukiup tulliani pisussat piareersarneqalereersut

Ukiup tulliani pisussat pilersaarusiorlugit aallartinneqareerput aaqqissuisullu ulapputissaqarujussuanngillat. Aappaagu aggustip aallaqqaataat tallimanngornerussaaq Tivolimilu tallimanngornerit tamaasa rockinik tusarnaartoqartarmat aaqqissuisut pilersaarusiorfigivallaassanngilaat.

- Pinngittoorata eqqarsalereertarpugut susoqarnissaanik, kisianni 2025 allaanerungaatsiartussaavoq tassa tallimanngornerusussaangami tassani Tivolip fredagsrock ingerlattarpaat taamaalilluta aggustip aallaqqaataani 2025-imi suliaqarpallaassanngilangut kisianni aappaagu 31-iani pisussat eqqarsaatigillattaalereernikuuagut qanoq ingerlanneqassanersut.

Ukiup tulliani pisussat kisimik pilersaarusiorneqanngillat, 2026-imi Kalaallit Nunaat Tivolimi ukiuni 50-inngortorsiorluni nalliussineqassasoq pisussanillu pilersaarusiornerit aallartisarneqartut, saqqummiisartup Carsten Siegstadip naggasiutigaa.

Aaqqissugaq 1976-imiilli ukiut tamaasa aaqqissuunneqartarpoq, Coronaqarneranili 2020-imi aaqqissuunneqarnani.