Nipilersornermik pikialaarfimmi nutaami Simon Lynge nuannarineqarluarpoq
Nipilersornermik pikialaarfimmik aaqqissueqataasut ilaata, Sisimiuni atuarfiit ilaanni nipilersornermik ilinniartitsisuusup, Jakob Froberg-ip aaqqissuussaq iluatsinnerarpaa.
- Ajunngilluinnartumik ingerlanneqarpoq aamma isissutissat suli pisiarineqarsinnaapput, Jakob Froberg oqarpoq.
Arctic Sounds-imi pingaarnertut nipilersortinneqarput Simon Lynge, Small Time Giants aamma G-60. Aamma nipilersortartut allat nunanit 14-init tikisinneqarsimasut tusarnaartitsissapput Sisimiuni sumiiffinni arlalinni, soorlu Kulturikkut illorsuarmi Taseralimmi, Timersortarfissuarmi aamma akunnittarfiit ilaanni. Taakku saniatigut tupersuarmik nappaaasoqarpoq aamma nipilersorfiusinnaasumik.
Simon Lynge maannamut pingasoriarluni tusarnaartitsereerpoq ilaatigut aamma meeqqanut tusarnaartitsilluni. Simon Lynge meeqqanit nuannarineqarluartoq, Jakob Frobergip oqaatigaa.
- Simon Lynge assut ulapippoq. Ilulissanut ullumi ingerlaqqittussaavoq aallannginnerminili meeqqanut tusarnaartitseqqaarpoq, sulilu tusarnaartitsinera naammassinngitsoq, suleqatitta ilaannit aaneqarpoq aallariartuunneqaraluarluni. Biilinut ikereeraluarluni nipilersorfimmut qaqeqqippoq nipilersoqqilaarlunilu. Aatsaallu arlaleriarlugu oqarfigineqarami aallaariartuinnarpoq, Jakob Froberg oqarpoq.
Unnugu tusarnaartitsisussat tassaassapput Small Time Giants aamma G-60.
- Small Time Giants-imi nipilersortartut Qaqortormiuupput maannali Danmarkimi najugaqartut. Danmarkimi Europamilu tusarnaartitsisarput, CD-liaallu siulleq arlalinnik nipilersuutinik imaqartoq saqqummigajalerluni. G-60 qangali Kalaallit Nunaanni tusaamasaapput. Taakku tusarnaartitsinissaat qilanaaraara, tassami qangarsuarli kingullermik Sisimiuniipput. Arctic Sounds-imik aaqqissueqataasoq, Jakob Froberg oqarpoq.
Sisimiuni nipilersornermik pikialaarfik, Arctic Sounds aqagu naammassineqassaaq.
Small Time Giants aamma G-60 unnugu tusarnaartitsissapput Sisimiut timersortarfissuani nalunaaqutaq quliniit aallartittumik.
Arctic Sounds ukiut tamaasa apriilimi pisalernissaa siunertaavoq.
