Nioqqutissat nungulertortarnerat Kamimmi aamma malugineqarpoq
Nioqqutissat ulluinnarni pisariaqartinneqartut nunguttullu niuertarfinni allani aamma ingerlaannaq nunnguttarput, tamannalu niuertarfinni Kaminni aamma malugineqarpoq, pisiniarfinnilu Kaminni aningaasat kaaviiaartinneqartartut amerleriarnerannik kinguneqarluni, Erik Brogård niuertarfinni Kaminni pisortaasoq oqarpoq.
Royal Arctic Linep assartuutaasa angalanissamut pilersaarutaasa allanngortinneqarnerisa kingorna, nioqqutissat tallimanngornikkut tikiunneqartarput, aatsaallu sapaatip akunnerata tulliata ingerlanerani nioqqutigineqarnissaannut inissinneqartarlutik, tamannalu allannguut niuertarfinni Kamiup ingerlataanni malugineqartartoq, Erik Brogård oqarpoq.
Nioqqutissat Aalborgimit Nuummut assartorneqartarnerisa sivisussusiat allannguuteqanngikkaluartoq, tikisinneqartarnerisa akuttussusiat allangorpoq, tassa siullermik ullut arfineq-marluk qaangiukkaangata tikiunneqartaraluarlutik, maannakkut ullut qulit qaangiukkaangata aatsaat Nuummut tikiunneqartarput. Umiarsuit nioqqutissanik assartuutit sapaatit akunneri allortarlugit tallimangornikkut Nuummut tikittarput.
Royal Arctic Linep umiarsuaasa angalasarnerisa allannguutaat marsip ulluisa 19-anni atuutilissaaq, taamanikkussamullu naatsorsuutigineqarpoq, nioqqutissat ulluinnarni pisariaqartinneqartut niuertarfinni naammattut pisiarineqarsinnaajumaartut.
