Nioqqutissat akii qaffarialaarput

Pisiassat akii ukiormanna januaarip allaqqaataannut tunngasut Naatsorsueqqissaartarfiup saqqummiuteqqammerpai. Tassani takuneqarsinnaasutut ataatsimut isigalugu pisiassat akiisa qaffariaataat 1,7 procentiuvoq, taannalu akit 2010-mi juulip aallaqqaataanni qaffariaataanit minneruvoq, taamanimi qaffariaat 2,3 procentiugami.
Allattoq Elisa Isaksen
apriilip 05-at 2011 06:01

Aningaasat nalikilliartornerannut inuussutissat akiisa qaffanerannut ilaatigut pissutaaqataapput. Inussutissat ilaasa akii nunarsuatsinni qaffariartupiloorput, atuisunullu akinik naatsorsuinermi inuussutissat akii sunniuteqaqalutik. Tassami isertitat 24,1 procentii inuussutissanut atorneqartarmata.

Ukiup affaani kingullermi inigisamut akit siorna 1,1 procentimik qaffariarput - pisortat inissiaataanni inigisamut akiliutit qaffaseqisut tamatumani pissutaaqataallutik.

Inuussutissat akisunerulernerisa kinguneranik neriniartarfinnut neriartorneq akisunerulerpoq. Neriniartarfinni akit ataatsimut isigalugu 2,4 procentimik qaffariarsimapput.

Tamatuma akerlianik meeqqanik paarsisitsineq akikilleriarsimavoq. Kommunit akinik allanngortiterinerisa kinguneranik akit 10,5 procentimik appariarsimapput. Tamatuma peqatigisaanik akinik nalunaarsuinermi sunngiffimmi kulturimilu akit 1,1 procentimik appariarsimapput. Matumani ilaatigut radiot tv-llu akiisa appariarsimanerat pissutaavoq.

Akinut tunngasutigut Danmarkimut naleqqiulluta aniguilluarneruvugut. Tassami ukiuni kingullerni maani aningaasat nalikilleriarnerat 1,7-iuvoq, Danmarkimi 2,7-iusoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq