Nioqqutissanik assartuut sikuummat Qeqertarsuup Tunuanut apuutinngitsooqqittoq

Kitaata imartaata ukiunut siuliinut naleqqiullugu sikuunerunera Royal Arctic Linep Qeqertartsuup Tunuani nioqqutissanik tunisassianillu assartuiniarnerani ajornartoortitsivoq.Taamaannera tamaani aalisakkanik tunisassiorfiit mikinerusut akunnattooqqalernerannik malitseqarpoq.

Oqaatsuni qaleralinnut tunisassiorfiup namminersortup, Rodebay Fiship, tunisanut qerititsivii ulikkaalerput.

- 20, 30 tonsi tulaanneqarpat taava ulikkaavissuugut. Soorlu assersuutigalugu sapaatit akunnera kingulleq tallimanngormat, ulloq ataaseq 10 tonsingajaavimmik tigusivugut, Rodebay Fiship tunisassiornermut pisortaa, Knud Fleischer, pingasunngornermi taama oqarpoq.

Tunitsiviit marluk matugallariaannaasut

Umiarsuaatileqatigiiffiup Royal Arctic Linep angalanissamut pilersaarutai malillugit maajip arfernani aatsaat Oqaatsunukartoqassaaq. Qerititsivillu tassani aatsaat imaarneqassalluni. Tamanna nunaqarfiup tunisassiorfianut tunisisartunut kingunerlussinnaavoq.

- Ulikkaarutta allatut ajornartumik tunisineq unitsissuarput, Knud Fleischer oqarpoq.

Ilulissat Kangerluanni aalisartut Oqaatsunut aamma niooraasartut, tunisassiorfimmi pisortaq oqarpoq. Sulisut arfineq-marluk tunisineq unissappat aamma angerlartiinnarneqassapput.

Oqaatsuni tunisassiorfik kisimi taama ajornartorsiunngilaq. Ilulissani tunisassiorfik namminersortoq, Halibut Greenland qerititsivimminni aamma qaleraliutilissuupput. Royal Arctic Line-llu umiarsuai Ilulissanut tikillutik qeritisivinnik imaarsinngippata ajornartuuissapput.

- Tingooqqaanerput matusariaqassasoq ulikkaartoornerup kingunerisaanik, suliffeqarfiup pisortaa, Erik Sivertsen oqarpoq.

Taamalisoqassagaluarpallu sulisut 30-it missaanniittut aamma sulisinnaassanngillat.

Aqqutissarsiortoq

Royal Arctic Linep umiarsuaq assartuut, Mary Arctica, Qeqertarsuup Tunuanut ingerlangaluarnermini Kangaatsiap avataanut pingaluarsinnaarluni maanna kujavarterluni allamik aqqutisssarsiulertoq paasissutissiissutigaa.

Tuniniaanermut pisortap Niels Clemensenip oqarnera naapertorlugu umiarsuaq Aasiannut akunnerit 24 tulliisa ingerlanneranni tikinnissaa piviusorsiunngilaq.

Ilulissani Royal Greenladip tunisassiorfiata qerititsivia ullut 14-it missaanni suli qaleralinnik immersinnaasoq, tunisassiorfimmi pisortaq paasissutissiivoq.