Nioqqutissaataarunneq KNI-mut akisusinnaavoq
Isumaqatigiissummik sumiginnaasoqartillugu Namminersorlutik Oqartussat 100.000 koruunit angullugit akiliisitsinissamik piumasaqaateqarsinnaapput. Tamannali aatsaat pisinnaalluni isumaqatigiissutip annersaanik piaarinani piaaraluniluunniit angisuumik sumiginnaasoqarsimatillugu.
Inatsisartuni ilaasortap Andreas Uldumip Demokraatineersup § 37 najoqqutaralugu apeqquteqaataanut, Naalakkersuisuni ilaasortaq Jens B. Frederiksen akissummini taama allappoq. Aasaq manna siusinnerusukkut Qeqertarsuarmi sikaritsinik amigaateqartoqalernera pillugu kinguneqartitsisoqarsinnaanersoq Andreas Uldumip apeqquteqaatigaa.
- Sulianut, pineqartumut assingusunut atatillugu illuatungeriit oqaloqatigiittussapput, tamannalu amerlanertigut suleriaasiusarpoq eqaannerujussuusoq sukkanerujussuusorlu, Jens B. Frederiksen allappoq.
Kiffartuunneqarnissamik isumaqatigiissummut nutaamut atatillugu qaammatit pingasukkaarlugit ataatsimeeqatigiittarnissaq ilanngunneqarpoq, ataatsimiinnernilu KNI-p ilaatigut kiffartuunneqarnissamik isumaqatigiissutip qanoq ingerlanneqarnera aamma piffissami qaangiuttumi ajornartorsiortoqarsimanersoq Naalakkersuisoqarfimmut ilisimatitsissutigisussaavaa.
Pilersuinermilu ajornartorsiutaasartut ajutoornermik, kukkusoqarneranik silarlunneranilluunniit pissuteqartartut, siornatigut misilittagaasartut paasinarsisippaat.
suliffeqarfiup arlaleriarluni piaaraluni kiffartuunneqarnissamik isumaqatigiissummi aalajangersakkanik saneqqutseriaraluarnerani Pineqaatissiissutaasinnaasut taamaallaat atorneqarsinnaapput. Misilittakkavut naapertorlugit suliffeqarfiit kiffartuunneqarnissamik isumaqatigiissuteqarfigisatta arlaannaalluunniit taamatut pissusilersorsimanngilaq, Jens B. Frederiksen parteeqatiminut Andreas Uldumimut akissummini taama allappoq.
