Nini Tessing ullumi ilineqarpoq
Nina Tessing aammigut kræfteqarluni ukiuni arlalinni napparsimavoq. Taamaattoq Københavnimi 2012-imi aasakkut ilinniarnertuutut soraarummeerpoq, tassa napparsimmavissuarmi innanngavimminiit Skype atorlugu soraarummeerami - tamanna KNR-imit malinnaavigaarput, Nini Tessingillu aqqa Nunatsinni taamanili ilisimanerulerparpullusooq.
Arnaq inuusuttunnguaq taanna imminut nalligaluni siniffimmini innangaannarusunngilluinnarpoq. Arlaannik angusaqarusukkaanni ilungersuutigigaannilu tamanna ajornanngitsoq, Ninip ilaqutaasalu qasseeriaqalutik takutippaat.
Ilinniarnertuunngorniartunut napparsimasunut ilinniarnertuunersiutit pillugit inatsisit Nini Tessingip napparsimanermini maalaarutigai, kalaallit napparsimasut Danmarkimi atugaat naammagittaalliutigisarlugit, patilersittussallu nunarsuarmit tamaneersut nalunaarsorsimaffianni kalaallit amigaataavallaarnerat aamma maalaarutigalugu.
Nini Tessing toqutinnani KNR-imut ima oqarpoq:
- Kalaallit Nunaanni ataqatigiimmik aaqqissuussisarneq arriippallaaqaaq. Kukkunerusinnaasut amigaataasullu tamanut saqqummiuttarsinnaagaanni tamakku aatsaat iluarsineqarsinnaapput. Kikkulluunniit - immaqa arlaatigut napparsimasut - nalunngikkaangamikku malinnaavigineqarlutik, suna tamaat pitsaanerulaartumik ingerlakkusuttarpaat.
Nini Tessing Københavnimi Oqaluffissuarmi naalagiutigineqareeruni, nammineq kissaataa naapertorlugu, inunngorfimmini Qaqortumi ilisaassaaq.