Nikolaj Coster-Waldau nerrivimmi arsaararnermi GM-qataavoq
Nuummi timersortarfissuarmi Inussivimmi nerrivimmi arsaarartartut peqatigiiffiat NNAP sinnerlugu GM-qataasoq assiliseqatigineqaqattaarpoq.
Unammisormi taanna tassaavoq isiginnaartitsisartoq Nikolaj Coster-Waldau maanna filmimi nutaami Netfliximi Against the ice-mi pingaarnertut inuttaasoq, tassanilu tunup avannaarsuani ilisimasassarsiorneq pineqarpoq.
- Februarimi maaniippunga ningaaqatigalu sungiusaqatigalugu, Nikolaj Coster-Waldau kalaallimik Nukâka Coster-Waldau-mik nuliaqartoq KNR-mut oqarpoq.
- Isumalioqqaaraluarpunga piaarisoqartoq GM-mi peqataarusunnersunga aperisoqarmat. Sorianngitsorli pilerpara GM-qataasussatut nalunaarutigineqareerlunga, oqaluttuarpoq.
Nikolaj Coster-Waldau nuannariinnarlugu ukiorpassuarni nerrivimmi arsaarartarpoq ilaquttariillu Danmarkimi, Tuluit nunaanni Nunatsinnilu najugallit ukioq allortarlugu unammiuaartarlutik.
Maannali GM-qataanermini ilungersornerusariaqarpoq inoqarfinniit assigiinngitsuneersut unammisaqattaaramigit.
Kvartfinalemut ingerlaqqippoq
- Assorujussuaq nuannerpoq Kalaallit Nunaanni sumiiffippassuarneersut takullugit. Nerrivimmi arsaararnerup tassa nuannersua. Timersortarfissuaqartariaqanngilatit katersortarfillu nerrivillu kisiisa atorlugit nerrrivimmi arsaararsinnaagavit, Nikolaj Coster-Waldau oqarpoq.
Maannalu GM-qataanermini unamminermi misilittagaqarnerulerpoq ukioqqortussutsit utoqqasaat utoqqasaallu angajulliit peqataaffigigamigit.
- Ajorsartarlunga ajugaasarpunga. Utoqqasaani ingerlaqqinngilanga utoqqasaanili angajullerni kvartfinalemut ingerlaqqillunga. Kisianni ilimanarluinnarpunga tassanngaanniit ingerlaqqinnaviarnanga, Nikolaj Coster-Waldau qungujulluni oqarpoq aammalu oqaluaralugu NNAP tassaasoq peqatigiiffik ilaasortaaffini siullerpaaq.
Nerrivimmi arsaararnermi GM-mi peqatigiiffiit peqataasut aqqaniliupput illoqarfinnit nunaqarfinniillu aggersut.
Nunatsinni pissartanngorniunneq arfininngornermi inissinniuttoqareerpat naammassissaaq.
